Faarsaleeyyetike Sooresi'aa Qorexxe Hortexxa Gence

1 Gadansii muummeti wode'e ha'wo'a halchammashsha

Ee, Magenoo lubbo anxinna atee iittanni halchitaan.

2 Lubbo anxinna Mageno, hedhaaka Mageno dhebo'wite;

alba atika uudonna'a atibaa dagannok haanotetaa?

3 Manji anee'e barra duuchcha

«Mageni atik haba hedhe?» hiyya'n qoraaxxe yanna duuchcha'n

anxi indiddo ani'a hashsha barra hitate kadde.

4 Lubbo anxi ani giddo cingitanaa'a hedaannaxxi yaanuwwaari,

ayyaneefata'neeka arda Mageniinke minibaa akeeka'n,

tuutati welti

illilleetetinna galatiinxe faaronni,

ardik welti hitta me'aannaxxa qalli hiyyenne.

5 Tee anxe lubboo mayyee yaaddatto?

Mayeeteta ani giddo weekendaatechchi?

Magenonga heqedhi;

anjirallo ankanna Mageno anka ani higee galateefatannon.

6 Lubbo anxi ani giddo weekende'een;

tennexxe'e Yordaanoosike boga'ni

Herimoonixxe tullo'ni

Mizaarixxe koobanaa'n atee qaabbatannon.

7 Atixxe gootoki luulji,

mitte dhi'mo mitteyexxaan;

danbala'iinxi ganeshsha duuchcha,

ani ha'nii'ni yaa'e.

8 Duuchchi Woddik Gootti jaalala ifixxa barra ajajaan;

hashshanna faaro isi'a faarsannon;

tinninna anxe hedhoxxe Mageniba'a shiqishaannexxe soodachchon.

9 Magenoo anxa rassaa,

«Mayee'e anee deetette?

Naaphi anee miica'naa

mayee yaada'n me'anno?» hiyyenne.

10 Ank naaphi barra duuchcha «Mageni atik haba hedhe?» hiyya'ni

anee yowwati micco anka enqe.

11 Tee anxe lubboo mayyee'e yaaddatto?

Mayeeteta ani giddo weekendaatechchi?

Magenonga heqqedhi;

anjirallo ankanna Mageno anka ani higee'e saadannon.