1 Me'aake ora'n hamatemabaake,

Duuchchi Woddike Goottike seerishsha galaake mannixxa wodo.

2 Dhugaa isixxa heqqedhaake,

mitte godobinni isoo yoraake mannixxa wodo.

3 Insa'ne xaqaro assinabaan;

yaane kinni ora isike'ni me'inaan.

4 Xonxoommante'e seera atika heqqe'nannoshsha

ati ajaje'eeten.

5 Seera atika heqqedhatike ora'n jabaate'e urre'eennele

hittatta eeyana'a!

6 Ajaja atike'n ille uggonnole

ookkone wodda salphatabe'non.

7 Atixxe qullummaxxa murte baratonnole

mitte godobinni atee galateeffatannon.

8 Seera atika heqqedhannon

haranga anee waaldoxxe'e.

9 Ka'umi ora ifika hitta ca'ummati heqqedhaa?

Ajaja atikishsha galatiten.

10 Mitte godobinni atee halse'eennen

seera atikenaa'n bayyatannoshsha assittoxxe'e

11 Atee balleessabe'noshsha

hiyyichcho atika godoba uggudheenne.

12 Ee, Duuchchi Woddike Goottaa! Ati saaddende'eeteken

seera atika anee barachchiisi.

13 Afo'o atikenaa'ni fula'neeka seera duuchcha

arabbo ankenni haaso'annon.

14 Manji karratixxe bira sa'ne'ni gammadammashsanni

dhugga atixxa hordofa anee gammachchiise'een.

15 Ajaja atika hiissee alalchannon;

ora atike'ni ille uggudhanon.

16 Seera atike'ni gammadonnole,

hiyyichcho atikanna dedhabe'no.

17 Hedhoti hedhonna'a, hiyyichcho atikanna heqqedhonna'a

anee erganjo atike'e eloxxa assi.

18 Seera atikenaa'n mambe'a yaane uudonna'a

ille anee baqqi assi.

19 Ani buttate'n keessummaten

ajajuwwa atika anenaa'ni shoxxoxxe'e.

20 Duuchchi wodda ajaja atika yorati

lubbo anxi wexeqenda.

21 Ajajuwwa atikenaa'ni fuleekanna

badinemeeka manna xixxaton.

22 Dhugaa atixxa heqqedhennen

yowwichchchokanna tuffe anenaa'n bayyisi.

23 Galchalluwwi ofo'le anee hamatoolenna midde

ani erganji atik seera atika hige higee qaabbatannon.

24 Dhugaa atixxi anxe gammashshon;

anxe gorsallon.

25 Injifatemee'e bukote'ni ibeennen;

hiyyichcho atikishsha anee hedhoke assi.

26 Ora anka duuchcha ate'n farri asse kule'eennen;

atinna hiissichcho ani'a uuteten

seera atika anee barachchiis.

27 Seera atikixxa barrachcho qalbeefatannoshsha assi;

aninna mambe'iinxa atixxa huje higgeggeenni qaabbatannon.

28 Lubbo anxi yaadoti wexeqende;

atike hiyyichchishsha anee jabeessi.

29 Sobiinka ora anenaa'n bayyisi;

badhaadha atikanna seera atika anee barachchiis.

30 Ani dhugaatike ora melledhe'eennen;

seera atikanna kallachchii edo uggudhe'eennen.

31 Ee, Duuchchi Woddike Goottaa!

Dhugaa atixxe'ni maxxane'eennen

shookannoshsha anee assitoxxe'e.

32 Qalbeeffachcho ani'a uutetaxxee'e

atike ajajuwwike ora'ni gonga'eennen.

33 Ee, Duuchchi Woddike Goottaa! Atike ajajuwwika ora anee barachchiis;

aninna muuxamii qico'ni isoo heqqedhannon.

34 Seera atika heqqedhannoshsha, mitte godobinninna isi'a ajajemannoshsha

qalbeeffachcho ani'a uwwi.

35 Ajajuwwi atik anee eeyiseemmaxxee'e

atike ajajuwwike ora'ni anee akeek.

36 Duroomatatee'e haafemati irra

seera atika muuxatixxi yorte ane'n hexxaashsha assi.

37 Toliincho ille anxi uudabaashsha anee heqqi;

atike ora'n hedho anxa uki.

38 Sodaatendattoshsha

erganjo atikee'e aaggettexxa kako muuxi.

39 Murte atixxi eloxxe kaddeemmaxxee'e

sodaatanneke salphinenaa'ni anee heqqi.

40 Kunse, ajajuwwa atika haalche'eennen

qullumma atixxenni hedho anxa uki.

41 Ee, Duuchchi Woddike Goottaa! Jaalala atixxi ani'a daggowwaal;

hiyyichcho atikishshanni anee anjir.

42 Hiyyichcho atike'n amaneennaxxee

anee yowwaakeeri'a hiissichcho uwwannon.

43 Murte atixxe'ni addateennaxxee

dhuggatika hiyyichcho afo'o ankenaa'ni haranga bayyissoxxe'e.

44 Baro baro'ni duuchchi woddi'a

seera atika heqqedhannon.

45 Ajajuwwa atika halseennaxxee'e

ba'latee me'annon.

46 Dhugaa atixxa moyanjuwwii edo haaso'annon;

haranga shookabe'non.

47 Ajaajuwwa atika eeya'eennaxxee

iso'ni gammadannon.

48 Eeyeenneke atike ajajuwwibaa ulfeesanen;

atike seerixxeenna hige higee qabbatannon.

49 Erganjo atikee aaggetexxa kako qaabati;

hiyyichchi atik anee hedhotike asse'een.

50 Atik haaso'i anee lubbo uggaammaxxee

tinni rakko anke jabeennen.

51 Hollaameeyye lumo qico ane'n gacifatte;

yaane kinni ani seera atikenaa'ni mishikki hiyabe'non.

52 Ee, Duuchchi Woddike Goottaa! Olmiinaa'ni hexxemmaxxa

atixxa murte qaabbatenne wodda jabaatenne.

53 Atika seera waldeexxe fuggaaleeyyenaa'ni kexxeexxa

aare gubatenne.

54 Keessummumma hedhenneke boga'ni

seeri atik anxe faaron.

55 Ee, Duuchchi Woddike Goottaa! Hashsha summa atika qaabbatanno;

seera atikanna heqqedhanno.

56 Ajaaja atika halsenne;

tinni huje anxe kaddeen.

57 Ee, Duuchchi Woddik Gootti qoobbo anken

seera atike'ni galonna'aa mudhdheennen.

58 Alba farri hiyyeekenni aniba'aa uuddottaa'a

mitte goddobinni atee halsaannen;

atike hiyyichchishshanni anee maraaran.

59 Ora anka qorqodheennen

me'aa anxanna atixxe dhugaaba'a wirri assedheennen.

60 Seera atika heqqedhonna'a

hoxemmeennen, rincico'ebe'non.

61 Fuggaaleeyye wodaro ani'a xaxxe;

ani kinni seera atika dedhabe'no.

62 Atixxe qullitte murtexxee'e

hashsha wodhakka atee galateeffatonna'a ke'annon.

63 Ani atee sodataake duuchchi'a

ajajuwwa atikaranna heqqedhaakeerike jaalon.

64 Ee, Duuchchi Woddike Goottaa! Maraarte atixxi butta duuchcha'n wo'mite'een

seera atikanna anee barachchiis.

65 Ee, Duuchchi Woddike Goottaa! Atike hiyyichchishshanni

erganjo atikee eloxxa asite'eeten.

66 Ajajuwwa atike'ni addateennaxxee

eloxxa qalbeeffachchonna ege'na anee barachchiis.

67 Rakkatebe'no edo ora ba'ee me'eenne;

ta'a kinni hiyyichcho atika heqqedhanno.

68 Ati eloken; assitatoxxinna eloxxen

seera atikanna anee barachchiis.

69 Hollaameeyye dharik summa anee balleessite;

ani kinni seera atika mitte godobinni heqqedhanno.

70 Insa'ne godoba jabakenna dillo'eeke mannan;

ani kinni seera atike'n gammadannon.

71 Seera atika baratonna'a

rakkatema ani'a eloxxe kadde.

72 Kuma worqenna biretike sibilji caala

atike afo'ika haaso'a ani'a woyya.

73 Anga atixxi anee loobbe'e giisiteen;

ajaja atika baratonna'a qalbeeffachcho ani'a uwwi.

74 Hiyyichcho atike'n addateennaxxee

ate'e sodaataaki duuchchi anee uudee gammadaan.

75 Ee, Duuchchi Woddike Goottaa! atixxi murte qullitteten,

anee xixxetelchinna xuurameesxummatite kaddeexxa ege'nenne.

76 Atike erganjo'ni addachchiisse'e haasoteteshshanni

jaalala atixxi anee jabeessitowwaal.

77 Seeri atik gammado anke kadeemmaxxee

hedhoti hedhonna'a jaalala atixxi ani'a daggowwaal.

78 Hollameeyye tola boddichcha ane'ni miidhema geessisseemmaxxee'e salphattowwaal;

ani kinni ajajuwwa atika higgeggeen qaabbatannon.

79 Atee sodaataakiir,

dhugaa atixxanna ege'neek manni aniba'a higowwaal.

80 Salphatabe'noshsha

ani mitte godobinni seera atike'n toggi hiyye galo.

81 Lubbo anxi anjira atixxa lumo qico yorte;

haaso'a atikanna addateennen.

82 «Haano anee jajjabeessitato?» hiyya'n

haaso'a atika heqqedhaa'naa'n ille anee gophphe.

83 Wiliillete'n fansendeexxe woyintixxa qalqallo, labonnolenna

seera atika dedhabe'non.

84 Atike garbichchik bari hiteeke?

Anee shorredha'neeke manna'ni haano murtatto?

85 Seera atikishsha hexxabaaxxi hollaameeyye

bale ibannoxxa ani'a qotte.

86 Ajaaji atik duuchchi addateme'eeken;

manni tola boddichcha anee shorredheen, anee gargaar.

87 Buttatenaa'n anee balleessino'a heenoxxe yanna gate'eemman;

ani kinni atika ajajuwwa waalabe'non.

88 Jaalala atixxenni lubbo anee uki;

aninna atike afo'ika haaso'a heqqedhannon.

89 Ee, Duuchchi Woddike Goottaa! Haaso'i atik iimate'n

duuchchi woddi'a dhugaaten.

90 Xuurameessumma atixxi ilatenaa'ni ilati qico'ni hexxaaxxen;

ati butta, jaabeessite'e ofo'lshe'eeten;

isenna hexxaan.

91 Duuchchiinxi dada ati'a ajajendaammaxxe'ee

seera atikishshanni telchi qco'n hexxeen.

92 Seeri atik gammado anke kada gopheele,

wixixxii anxenaa'ni kexxeexxa silaati ba'eennan.

93 Isinni lubbo anee ukkeettaxxee'e

ajajuwwa atika haranga dedhabe'non.

94 Ajajuwwa atika halseennaxxee'e

ani atiken, anee anjir balloo.

95 Fuggaaleeyye anee balleessito'aa gaada'neen;

ani kinni seera atika higgeggeenni qaabbatannon.

96 Duuchchiinxe yaane ifi ifinga muuxama affe'eexxa afenne;

ajajuwwi atik kinni gabala afebaan.

97 Ani seera atika hittatta eeyyenne!

Isoonna barra duuchcha higgeggeenni qaabbatannon.

98 Ajajai atik anibrii'ni qo'aa gophaammaxxee'e

isi naapha anki caala anee'e qalbeefatannoke asse.

99 Dhugaa atixxa higgeggeenn qaabbataannaxxee'e

anke barachchiisalluwwi caala qalbeefataannen.

100 Ani ajajuwwa atika muuxaannaxxee'e,

geedheti caala qalbeefatannoke kadennen.

101 Haaso'a atika heqqedhonna'a

lekka anxa fuggoke ora duuchchanaa'n hoyyedhenne.

102 Atinni umo atikenni anee barachchiiseettaxxee'e

atixxe murtenaa'n gorebe'non.

103 Hiyyichchi atiki hittatta xe'maake!

Malebiinxe la'ee irra xa'ma'neeken.

104 Ajajuwwa atikenni qalbeeffachcho alfenne;

tennexxee'e dhariinka ora duuchcha jibbenne.

105 Seeri atik lekka anxee xassake;

ora ankeenna ifaken.

106 Qullummatika atika seera heqqedhonna'a

kakate'eennen; iso'ninna jabaatannon.

107 Ee, Duuchchi Woddike Goottaa! Lomoshsha rakkate'eennen,

haaso'a atikishsha anee lubbo uki.

108 Ee, Duuchchi Woddike Goottaa! Eeyye uwwaanneka anke afo'ike galatika tolcha adhdhi;

seera atikanna anee barachchiis.

109 Lubbo anxi duuchchi wodda rakko giddo hexxeen;

ani kinni seera atika dedhabe'non.

110 Fuggaaleeyye fonxoro ani'a falte;

ani kinni ajajuwwa atikenaa'n gorebe'non.

111 Anxe qalbexxe gammashsho kaddeemmaxxee

dhugaa atixxi duuchchi woddixxe anxe karran.

112 Baro baro'n, duuchchi woddi'a

seera atika heqqedhonna'a isibaa godobik mudhdheennen.

113 Elqe kayyi'a daaqaaka manna jibbenne;

seera atika kinni eeyyenne.

114 Ati anke gollanna anxe wonten;

haaso'a atikanna addatee heqqedhannon.

115 Anke Magenika ajajuwwa heqqedhonna'a

ha'noo fuggoxxa assitnaak anenaa'ni bayyatte.

116 Haaso'a atikishshanni anee kiphi; lubbotinna hedhannon;

addetanna gophe'e shookannoke assitoxxe'e.

117 Fayyonnaa ane'e gargaar;

seera atika duuuchchi wodda uudannon.

118 Halcha insa'neexxi xaqaarotete kaddeemmaxee

atike seer gadho me'aaka duuchcha fugussi.

119 Buttatixxa fuggaaleeyye duuchcha koriinsha fugussittaton;

tennexxee'e dhugaa atixxa eeyyenne.

120 Atee sodaatatenaa'ni kexxeexxa bisi anee roqonsaan;

murte atixxanna sodaatannon.

121 Dhugaanna qullumma hexxeexxa yaane asseennen;

miicaake manna'n anee sa'issite uuttoxxe'e.

122 Garbichcha atikee eloxxi kaddaashsha assi;

fuggaaleeyye anee miicco'a waaldoxxe'e.

123 Anjirallumma atixxanna,

dhugaatika hiyyichcho atika ille anxi heqqexxe gophphe.

124 Garbichcha atike'e jaalala atixxishshann aassi;

seera atikanna anee barachchiis.

125 Ani garbichcho atikenni

dhugaa atixxanna ege'nonnaa qalbeeffachcho ani'a uwwi.

126 Ee, Duuchchi Woddike Goottaa! Manji seera atika sa'eemmaxxe'e

murte atixxa leellishattoxxi iitti yanna ta'aten.

127 Ajajuwwa atika woreqeti irra, caalchissee eeyyannon;

eetti, ca'itte worqe irra caalchiissee eeyyannon.

128 Ajajuwwi atik duuchchi toggichaken;

tennexxee dhariinka ora duuchcha jibbeennenni.

129 Dhugaa atixxi duuchcha mambe'aken;

tennexxee lubbo anxi ise'aa ajajendaan.

130 Atike hiyyichchixxi tika ifissaan;

ege'naa afebaaka mannanna qalbeefataake assittaan.

131 Ajajuwwa atika yo'oshsha halcheennaxxee

haanni hiyyee heqqedhaannen.

132 Summa atika eeyyaakee'e assitatashshanni,

anibaa higge'e ani'aa ba'lati.

133 Me'injo anka hiyyichchi atikishshanni ani'a toggi assi;

cubbotinna ani hana mooto'aa waaldoxxe'e.

134 Ajajuwwa atika heqqedhannoshsha

miicaake mannanaa'n anee anjir.

135 Garbichcho atikee alba ifi;

seera atikanna anee barachchiis.

136 Ardi seera atika sa'eemmaxxee

indiddo anenaa'ni wode'iinsha dunendaan.

137 Ee, Duuchchi Woddike Gootta ati qullichchaken;

murte atixxinna gugurto affeexxebaan.

138 Dhugaa atixxa qullummati ajajjeten;

isenna yo'oshsha addatendeexxen.

139 Naaphi anki hiyyichcho atika dedheemmaxxee'e

yo'oshsha aare gubatennen.

140 Hiyyichchi atik yo'oshsha luqqi hiyyeeken;

ani garbichchi atikinna isoo eeyyenne.

141 Ani heenokenna tuffatemeenneken;

yaane kinni ajaja atika dedhebe'non.

142 Qullumma atixxi duuchchi woddixxe qullimman;

seeri atikinna dhugaaten.

143 Rakkonna abari ane'n geye;

yaane kinni ajajuwwi atike anke gammadon.

144 Dhugaa atixxi duuchchi woddixxe qullummatixxe dhugaan;

hedhoti hedhannoshsha qalbeefachcho ani'aa uwwi.

145 Ee, Duuchchi Woddike Goottaa! Mitte godobinni atee ye'edhaanneni heeyyi;

seera atikanna heqqedhannon.

146 Ani atee ye'edhaannen anee anjir;

dhugaa atixxanna heqqedhaannon.

147 Anee gargaartottaa boro haachchabebaangi

ke'ennexxi atibaa oodhannon;

hiyyichcho atikanna addatannon.

148 Hiyyichcho atika higgeggeen qaabatatee'e

diiphi ane'ni wilebaangi galannon.

149 Atixxe jaalala hiteetexxi haaso'a anka laqi;

Ee, Duuchchi Woddike Goottaa atike seerishshanni hedho anee uki.

150 Fuggoxxa ani'a mari'ataak manni anibaa shiqe'een;

seera atikenaa'ni kinni insa'ne bayyante'eeken.

151 Ee, Duuchchi Woddike Gootta ati kinni shiqiken;

ajajuwwi atik duuchchinna dhugaaten.

152 Seeri atik duuchchi woddi'a hedhaake assiteetexxa

birenni dhugaa atixxenaa'ni barateennen.

153 Seera atika dedha gopheennaxxee

rakko anxa uude'e anee gargaar.

154 Ani'a baasite'e anee wod;

hiyyichcho atikishshanna lubbo anee uggi.

155 Insa'ne seera atika halsaa gonpheemmexxee

fuggaaleeyye woddabexxon.

156 Ee, Duuchchi Woddike Goottaa! O'wa atixxi lumoshsha lumooxxen;

seera atikishshanni hedho anxa uki.

157 Anee shorredha'neek ank naaphi heddoken;

ani kinni dhugaa atixxenaa'ni gorebe'non.

158 Hiyyichcho atika heqqedha gonphammaxxee

finqila manna uude jibbenne.

159 Ajaja atika hitta eeyyaanne qico uudi;

Ee, Duuchchi Woddike Goottaa! Jaalala atixxishshanni hedho anxa uki.

160 Hiyyichchi atik duuchchi dhugaaten;

qullite atixxi murtenna duuchchi woddixxen.

161 Galchalluwwi tola boddichcha anee shorreen;

ani kinni haaso'a atika mitte godobinni ulfeessenee sodaatanno.

162 Lumoxxa boji'o alfeeke manjishsha

hiyyichcho atike'n yo'oshsha gammadenne.

163 Dhara jibbennen, boshshedhenne;

seera atika kinni eeyyenne.

164 Dhugaatixxe atixxe muritexxee

barate'ni atee torbaanele galateffatannon.

165 Seera Atika eeyyaakiir wo'ma nage'a afe'eeni;

mitte yaanenna insa'nee'e guguffachchiissaaxxi hexxebaani.

166 Ee, Duuchchi Woddike Goottaa!

Ane gargaartattoxxa addatee heqqedha'eennen;

ajaja Atikanna muuxxannon.

167 Ajajuwwa atika heqqedhannon;

mitte godobinninna isoo eeyyannon.

168 Ajajuwwa atikanna seera ulfeesannon;

ani assannoxxa duuchcha ati uudattoni.

169 Ee, Duuchchi Woddike Gootta!

Oodhishsha anxa laqi

hiteeteshshann qaabbatannoke assi.

170 Soodachcho anxi ati edo dagge geltowwaal;

hiyyichchi atikishshanni anee anjir.

171 Seera atika anee barachchiissattaxxe'e

duuchchi wodda atee galateeffatannon.

172 Ajaji atik duuchchi dhugaate kadeemmaxxee'e

isoo farsa'eennen.

173 Ani ajajuwwa atike'ni galonnaa fi'leennaxxee'e

duuchchi wodda anee gargaartota'a qixxeeffati.

174 Ee, Duuchchi Woddik Goottaa!

Anee gargaartota'a mitte godobinni heqqedhaanneni

seera atika eyyeennen.

175 Atee galateeffatannoshsha

baro ani'a qeerrisi;

seeri atik anee gargaaro'o.

176 Ba'eeke gedhebishsha doonissa kiyya hiyyennen.

Kaddo malee seera atika dedha gopheennaxxee'e,

anee erganjo atika daggee harachchiis.