1 Ee, Duuchchi Woddike Goottaa! mitti godobinni atee saadannon;

magenuwwii edo faaroti atee saadannon.

2 Hiyyichcho atikanna summa atika duuchchiinxe yaane irra ulfeesiteettaxxee'e

atike woyyichcha galmi darre'n wirri hiyye'e heeshshi qokki hiyyee'e,

atixxe jaalalaxxeenna atixxe xuurameessumma'aa summa atika saadannon.

3 Atee ye'edhenne wodda ani'a hee hitteetten;

lubbo anxa jabeessitee hunnameessake anee assitetten.

4 Ee, Duuchchi Woddike Goottaa!

Atike afo'ika haaso'a laqaa wodda buttatik moyanjuwwi duuchchi atee galateeffatuun.

5 Duuchchi Woddike Goottik gaachchanni lumoke kadeemmaxxee'e

insa'ne Duuchchi Woddike Goottika ora faarsinaan.

6 Duuchchi Woddik Gootti xungote'n hedhoolenna

butta hedheeka uudaan;

yaane kinni bayyanni hedhe'e hollameessa ege'naan.

7 Rakko anee qoqqobee'naa me'onnolenna

ati hedho anxa heqqittatton;

anke naaphixxe mufe'n anga atixxa wirri assitee'e

middixxe anga atixxenni anee anjirtatton.

8 Duuchchi Woddik Gootti ifika yaada ani'a muuxaan;

Ee, Duuchchi Woddike Goottaa! Atixxi jaalala duuchchi woddixxen;

atixxe angaxxa huje waaldoxxe'e.