Faasaleeyyetike sooreesi'a Qorexxe Hortexxa Faaro.

1 Ee Duuchchi Woddike Goottaa! Atike bogi'a eloxxa assiteten;

Ya'iqoobixxe horte'a haaroba godda hiissitete.

2 Atike ardixxe balleessa'a gatowwaal hitete;

cubbo insa'neexxa duuchchanna leellitabashsha assitete.

3 Atixxa mufe enqexxe'eeten;

bubba'neexxa atixxa aarenna hiissexxe'eeten.

4 Ee no'oke anjirallo Magenoo! No'oo ediba'a hiissi;

no'o'ni qoxxi hiyya waal.

5 No'o'ni duuchchi woddi'aata muffatatto?

Mufe atixxi ilatenaa'ni ilate'n saxxaata?

6 Ardi atik ate'n gammado'a

haaroba hedho no'aa ukkabexxoo?

7 Ee Duuchchi Woddike Goottaa! Jaalala atixxa no'oo uudisi;

anjira atixxa no'aa badhaasi.

8 Mageni Duuchchi Woddik Gootti haaso'aaxxa laqanno;

ifike qulichchi ardi'a nage'a haaso'aan;

kaddo malee meeni gowwummatibaa udumi'a hingowwaal.

9 Isi gaachchanna ifikenni boga no'oke'ni galo'a

isoo sodataake anjira isixxi dhugaaten shiqixxen.

10 Jaalalatinna dhugaa welti afende;

qullummatinna nage'i weli suunqedhe.

11 Xuurameessumma buttii'n iimi'a latte;

qullummatinna iimii'n butti'a uudde.

12 Duuchchi Woddik Gootti eloxxa yaane badhaasaan;

bog no'okinna midha fulchan.

13 Qullumma isi edo me'ita'n,

orakanna isi'a qajeelchitaan.