1 Fuggaleeyye uude'e bojogendoxxe'e;

cubbo hujaakaaranna gaabitoxxe'e.

2 Insa'ne iikki woddi badda'atishsha bangaan;

qufeeke shafishshanna qooraan.

3 Duuchchi Woddike Gootta'n addati; eloxxanna assi;

ookkone bogi giddo nage'ik offo'l.

4 Duuchchi Woddike Gootta'ni gammadi;

Isinna atike godobixxa halcha ati'a uwwaan.

5 Ora atika Duuchchi Woddike Gootta'n maganne uwwedhi

iso'ninna addati; isinna ati'a qajeelchaan.

6 Isi qullumma atixxa ifiinsha

dhugaaleessumma atixxanna saafo'iinxe arshoshsha xassaan.

7 Duuchchi Woddike Gootti edo sammi hite'e

ossati isoo heqqedhi;

ori isi'a qajeeleeke

fuggoxxa assaake manjixxee bojogendoxxe'e.

8 Mufetenaa'n ifi heqedhi; aaretanna waal;

bojogema fuggoxxa assate'ni atee geessissaan, bojogendoxxe'e.

9 Fuggaaleessi manni ba'a ba'aan;

Duuchchi Woddika Gootta'n addataak kinni boga dhaalaan.

10 Heenooxxe yanna'aate malee'e fuggichchi manji hedhabaan;

isoo hassetelenna midde bakka isixxa afabbexxon.

11 Shaqqak manni kinni boga dhaalaan,

wo'ma nage'i giddonna gammanda'nee he'naan.✝

12 Fuggaaleessi manji qajeela manjo balleesatee malaan;

suumettanna insa'ne'n ga'medhaan.

13 Dada duuchchik Duuchchi Woddik Gootti kinni

barra insa'nexxi sheqqeemmaxxa ege'neemmaxxe insa'ne'n oso'laan.

14 Hiyyeeyyetanna rakkiyye shiyyatee,

ba'lake godobika mannanna gorra'atee

fuggaaleessi manni wolaantichcha ifika luqisaan; gabe ifixxanna qophpheessedhaan.

15 Yanne kinni wolaatichchi insa'nek godoba insa'nenga otaan;

insa'nexxi gabenna enqendaan.

16 Shiixxoxxi qullichchiinxi karra

lumoxxa fuggaaleeyyetixxa karra saxxaan.

17 Fuggaaleeyyetixxi hirre enqema enqendaan;

qulliyye kinni Duuchchi Woddik Gootti kiphee abidaan.

18 Duuchchi Woddik Gootti barra barra'n insa'nee heqqaan;

insa'ne'a uwwendeexxi uwwanna duuchchi woddi'aten.

19 Fuggoxxe yanna giddonna shoonkabaan;

solo'iinke baro'ninna goddinaan.

20 Fuggaaleeyye kinni ba'aa baxxaan;

Duuchchi Woddike Goottik naaphi bada'atixxe danchummashshaa ba'aan;

wiliilletishshanna gophemaan.

21 Fuggichchi manji liqeefataan; hiissenna uwwaba'a;

qullichchi manji kinni ba'lumati hiissee uwwaan.

22 Duuchchi Woddik Gootti eebbiseek manni boga dhaalaan;

isi yowweeki kinni ba'aan.

23 Manjiinxi me'aa Duuchchi Woddika Gootta gammachchiisoole,

Duuchchi woddik Gootti ora isi'aa qajeelche'e tarkaaffe isixxa jabeesaan.

24 Duuchchi Woddiki Gootti anga ifixxenni iso'o kiphaammaxxee'e,

gugguffatoolenna ibabaan.

25 Ani dargageessummate'ni;

ta'anna cimo giddo,

qulliyye hunnendee'naa;

Oose insa'nexxinna ittaachcho gophpheexxi kadhata'naa haranga uude ege'nebe'no.

26 Isi duuchchi wodda ba'lataan, liqeessaan;

horte isixxinna welekee eebbate kaddaan.

27 Fuggoxxenaa'n bayyati; eloxxanna assi;

qeeraka barronna hexxatton.

28 Duuchchi Woddik Gootti dhugaatixxa murte eeyyaan;

ifika addatemalluwwanna waalabaan;

duuchchi woddi'anna insa'nee heqqaan;

fuggaaleeyyetixxi horte kinni baxxaan.

29 Qulliyye boga dhaaldaan;

qeeraka barronna ookko hexxaan.

30 Qulichchi manjik afo'i beekumik haaso'aan;

arabo isikenaa'ni dhugaatixxe yaane fuldaan.

31 Ifike Mageniki seeri qalbe isixxe'ni hedheen;

lekka isixxinna titimmissabaan.

32 Fuggaaleessi manji qullichcha gaadaan;

isoo shiyyo'anna hasaan.

33 Duuchchi Woddik Gootti kinni isoo naaphiinxe anga'ni sa'issabaan;

songote'n shiqaa woddanna murte iso'n murendo'a waalabaan.

34 Duuchchi Woddika Gootta addatte heqqedhi;

ajaja isikanna muuxi;

isi ookkone boga dhaaldotaa atee ulfeessaan;

fuggaaleyyetinna baxxaa'naa uuddatton.

35 Fuggichchikinna mararte afebaak manji,

Libaanosike biribisishsha bankaraarree'naa uudenne.

36 Yaane kinni illee iima higee ookko'ni sa'enne wodda bakka eettene'n hedhemmaba'a;

hasenne woddanna afemeba'a.

37 Qullichcha manjo hubatte uudi; godoba ba'laka manjonna qalbeeffati;

nageelchi manjixxi hegeree baxxabaan.

38 Cubbaaleeyye kinni mittenba baxxaan;

hegeree insa'neexxinna shakki hitaan.

39 Qulliyyetee anjirensha Duuchchi Woddik Gootti darre'nten;

rakkoti woddanna golli insa'neek isoten.

40 Duuchchi Woddik Gootti insa'nee gargaraan; insa'nee wodaan;

fuggaaleeyyetixxe anganaa'ninna insa'nee mucuqe fulchaan; insa'ne isoo gollake asse'neemmaxxee'e insa'nee'e anjiraan.