Faarotikaa Maxaafa 111

Duuchchi Woddike Gootti’a Shiqqeexxa Saadino

Hallee luya

1 Hallee luya;

Qajeeli mannixxe songo’n isike ardixxe bukki giddo

Duuchchi Woddike Gootti’a mitte godobinni galata shiqishannon.

2 Duuchchi Woddik Goottixxi huje lomoxxen;

ise’n gammadaak duuchchi, duuchchi wodda isee hedee heregaan.

3 Huje isixxi ulfiniinxenna gaachchaniinxen

qullumma isixxinna duuchchii woddi’a hexxaaxxen.

4 Mambe’iinxi isixxi huje qaabbatenda’n hexxaashsha asse;

Duuchchi Woddik Gootti ba’lakenna o’waaken.

5 Isoo sodataakeeri’a itaachcho uwwaan;

kako ifixxanna duuchchii woddi’a qaabbataan.

6 Arda ifikee wele gosaka boga uwwati

ifixxe hujeka lumminne arda ifikee leellisheen.

7 Isixxe angaxxi hujuwwa dhugaatenna toggitteten;

ajajuwwi isik duuchchinna addateme’eeken.

8 Barokenaa’n duuchchii woddi qico’n munnuqqi hiyyakebaan;

dhugaatinna toggichchummati hujeme’eeken.

9 Isi arda ifikee’e fayyunte erge;

kako ifixxanna duuchchii woddi’a ajaje;

summi isikinna woyyichchakenna sodateme’eeken.

10 Duuchchi Woddika Gootta sodaata

beekkumiike ke’iton;

ajaja isika muuxaak duuchchiirinna eloxxe qalbeeffachcho afe’een;

galati isikinna duuchchi woddi’a hedhaan.✝111:10 Iyo. 28:28; Mam. 1:7; 9:10.