1 Duuchchi Woddike Goottaa!

Anxa hunna atee eeyyaannen.

2 Duuchchi Woddik Goottii anxe rassa, anxe kollonna anke anjirallon;

Mageni itti gollatannoxxee anxe rassan;

isi anxe wontenna anxe anjirematixxe barraxxe, jabaxxe wolo'on.

3 Galati hasisaaka Duuchchi Woddika Gootta ye'edha'ennen;

isinna naapha ankenaa'n anee anjiraan.

4 Reyotixx ciniinito anee suruute;

ba'netinna lola'iinsha anee buqqe.

5 Hirreesiinxi wodaronna ane'n mirqende;

reyotixxe fonxoronna anee abidde.

6 Rakkatenne wodda Duuchchi Wooddika Gootta ye'edhenne;

anee gargaarashshanna Mageno sooddatenne;

isinna ifike galmi giddo hedheexxi haaso'a anka laqe;

oodhishsha anxanna caqase.

7 Magen mufatemmaxxee butta sheke sheke hite le'mite;

koobuwwa offoldeemmaxxi boosuwwanna giri giri hite.

8 Aaretixxi wiliilee isixxe sanonaa'n fulde;

gubaak giiratik buubenjinna

holataak kashil isike afo'onaa'n fule.

9 Iimuwwa benqi asseexxi butti'a dirre;

lekka isixxi hundanna xiledhe'e raachcho'eek duummanchi hedheemman.

10 Kiruubeelii gulufeexxi phirri hiyye;

diiddalotike keeli hana hedheexxi shuwwi hiyye.

11 Dukkana odho'we;

raachcho'eeki, xeeniink duummanchi isoo buqe.

12 Isi edo wa'a hiyyeeke ifanaa'n kexxeexxa

raachcho'eek duummanchi,

kaadenna giiratik xallaqqinni fule.

13 Duuchchi Woddiki Gootti iimatenaa'n dindime;

Dada Duuchchik Duuchchi Woddik Gootti haaso'a ifikanna laqise.

14 Mogido ifika darbeexxi naaphakanna xexeere;

banqotike balaqinninna insa'nee shorre.

15 Ee Duuchchi Woddike Gottaa! Naapha atika xixxete wodda

mufate insa'ne'n dindindette wodda lumoxxa abbayya buqqeemmak buttinni leelle;

buttatixxi boosonna ce'e hitte gatte.

16 Duuchchi Woddik Gootti iimatenaa'n anga diriirseexxi anee abide;

dhi'mo wode'enaa'ninna anee harkise fulche.

17 Ane'n ke'emmake, jabake naaphanaa'ninna anee gibammake manni duuchchixxe

anganaa'n anee gatise.

18 Rakkote'n hedhennaxxa yanna ane'n ke'ne lolle;

Duuchchi Woddik Gootti kinni anke kipha kade.

19 Qarrakenaa'n ba'labaa'a anee fulche;

anee eeyyemmaxxee anee anjire.

20 Duuchchi Woddik Gootti anxe qullummashshanni ani'a hira uwwe'een;

elloxxa assenneshshanni ani'a eloxxa asse'een.

21 Duuchchi Woddika Gootta ajajemee'e ora isike'n me'eennen;

anke Mageninaa'n udumi'a higennexxi fuggoxxa assebe'non.

22 Mageniinka seera duuchcha muuxeennen;

ajaaja isikanna gibebe'non.

23 Ani isi edo balleessa belo hedheennan;

cubbo hujabe'noshshanna ifi heqedhe'eennen.

24 Duuchchi Woddik Gootti qullumma anxishshanni,

ille isixxi edonna eloxxa assenneshshanni hira ani'a uwween.

25 Duuchchi Woddike Gottaa! Atee addataakee'e atinna addatende'eeteken;

fuggoxxenaa'n bayyataakeenna ati eloken.

26 Ca'ichchakee'e ati ca'ichcaken;

jallaammeyyetee kinni insa'neexxe jalloshshanni hira insa'ne'a uuttatton.

27 Ati shaqqaka manna anjirtatton;

ifi sadaaka manna kinni salphissatton.

28 Ee Duuchchi Woddike Goottaa! Ani'a ati anke ifan;

ee anke Magenoo, dukkana anxa ati ifissatton.

29 Atike gargaarsinni, loliinka sannachcha miidhanno;

ank Mageni ati, dalla'a utaale sa'annoshsha assittatto.

30 Mageniink or dedha afeekebaan;

Duuchchi Woddike Goottik hiyyichchi luqqichchaken;

isoo irko assedheeke duuchchi'a is wonteten.

31 Duuchchi Woddika Gootta malee'e ayyete Mageni?

Isoo malee irkote kadaak ayyete?

32 Hunna ani'a uwweexxi ora ankanna qajeelchaak

Magenoken.

33 Isi lekka anxa gophphabaaxxe buddannetixxe lekkashsha assaan;

qephphpichcha bonchuwwa'ninna mitte ruphphi belo uurrannoshsha assaan.

34 Hitta lolannoxxa isi, anee barachchiisaan;

sageettoti sibljixxa gabenna darbannoka uuduuda ani'a uwwaan.

35 Atixxa anjiratixxa wonte ani'a uuttette;

atixxe middixxi anganna anee kiphphe abidde;

anee gargaartottaa dagge'e anee lummissette.

36 Ora ani'a ba'liseten;

anxi lekkanna xaldebaan.

37 Naapha anka gussee abidannon;

insa'nee mundaa qici'anna uudumi'a higebe'no.

38 Dandaammantabaa qico'n insa'nee ganeennen;

insa'neenna anxe lekka hunda imbe.

39 Lolakee ani'a hunna uuttette;

anki naaphinna injifatemaashsha assittette.

40 Anki naaphi udumi'a hige baajaashsha assittetten;

anee gibamaka duuchchanna birtette.

41 Gargaaraaka alfatee raarreen, kinni alfineba'a;

Duuchchi Woddika Goottanna ye'e'neen, isinna hiissichcho insa'ne'a uwweba'a.

42 Diiddallo adhdhite me'itammaxxe bukkoshsha insa'nee bulleessenne;

or giddixxe dhoqqeshshanna insa'nee hirbeessennen.

43 Jallichcha ardanaa'n anee anjirtette;

gosa gosaka ardike umo anee assittette;

ege'nebe'noki ardinna ani'a hireme.

44 Ajaaja anka lanqeeshshanni ani'a ajaajjemaan;

alagikinna ani'a heeshshi qokki hiyyeen;

45 Alagi alayye culphise;

insa'nenna roqonsinna'n kollifanteebaa'n fulle.

46 Duuchchi Woddik Gootti hedheeken!

Golli anki isi ulfaatowwaal!

Anee anjirek Mageni lummedhowwaal.

47 Isi naapha anke'n halo ani'a fulaake,

gosa gosak ardinna ani'a hiremaashsha assaake Magenon.

48 Anke naaphanaa'ninna anee anjiraak isoten.

Ati anke naaphi hana anee lummissetten;

manjo midhaake mannanaa'n anee anjirtette.

49 Ee Duuchchi Woddike Goottaa! Tennexxee gosa gosake ardi giddo atee galateefataannon;

atika summanna faaroti farsaannen.✝

50 Moyaashsha assemmak moyanji injiffata'ni hedhaashsha assaan;

ifixxa duuchchi woddixxa jaalalanna hariireemmake ookkone'a,

Daawwiti'aanna, isixxe horte duuchchi'a, duuchchi woddi'a leellishaan.