1 Duuchchi Woddika Gootta galateeffatte!

Isi eloke kademmaxxeenna arda duuchchii wodda eeyyammaxxee

Duuchchi Woddika Gootta galateeffatte.✝

2 Isi asseexxa lumollamma yanne

ayyete laakko'e dhaqqaba?

Geyaaka galata ayyete isi'a uwwe dande'a?

3 Dhugaa huja dabbaabaashsha heqqedhaakeerixxanna

duuchchi wodda toggitte yaane

assaake mannixxa wodo!

4 Ee Duuchchi Woddike Goottaa!

Arda atika gargaartatto wodda aneenna qaabbati;

insa'nee anjirtatto wodda

aneenna anjir.

5 Atee faarsaake manninaa'n mitteke kadennexxi

atike ardika godda uudannokenna

insa'nenni gammadannoke anee assi.

6 No'oke edike annuwishsha cuobbo hunje'eennen;

balleessine'eennen; fuggoxxe'ninna me'ine'eennen.

7 No'ok ediki annuwwi Gibtsee bogi giddo

Duuchchi Woddik Gootti hujeexxa mambe'a yaannuwwa qalbeefatebaan;

ifixxe jaalalanaa'n kexxeexxa insa'nee'a asseexxa heddo yaanuwwa deene;

diimmoxe abbaayya bira iso'n jalline.✝

8 Kaddo malee'e ifixxa lumoxxa hunna ege'nisho'a,

summa ifikee hiyyeexxi insa'nee anjire.

9 Diimmoxxa abbaayya ajajee wodda isenna bagge;

dhi'mo wode'e qiilla gammoojje asseexxi

ifika arda akeeka'n foosse.

10 Insa'nee gibammake mannanaa'ni insaa'nee anjire;

insa'neke naaphanaa'ninna insa'nee gatise.

11 Yanne kinni naapha insa'neeka wodi'i liqiinse;

mittikinna insa'nee gidii'n gateek hedhemmabaan.

12 Ookkoneechchi uduma Mageniink ardi Mageniinxe addachchiisake hiyyichcho'n amaneexxi

galatiinxa faaronna isi'a faarse.✝✝

13 Yanne kinni asseemmaxxa mambe'a yaane duuchcha

iikki woddi deene;

Gorsa isika heqqedha ginbeexxi fedhii ifixxa asse'ne.

14 Qiilla gammoojje giddo heddo yaane yorreexxi

Magenokanna hega uunde.

15 Isoo kadhanteechcho duuchcha insa'ne'a uuwe;

kaddo malee'e yaayyisaaka dhukkuba insa'ne'ni ibise.✝

16 Qiilla gammoojje giddo he'nemma wodda Muuseenna

Duuchchi Woddike Goottika woyyichcha erganjo Aaroonii'i hinaanfe.

17 Buttini haanni hiyyeexxi

Daataanii'i liqiinse;

Aberoo'ninna isike mini hado'n tuuleme.

18 Insa'nexxe gamo kadeemmaka

ookkone fuggaaleessa manna giira iimi'ni dagge itte.✝

19 Koorebi he'nemma wodda worqeti jibichchiinxa fakke giise'neexxi

eettenne jibbichchiinxe fakke'anna sagande.

20 Mageniinka gaachchanna

badda'a dheedaake horxe fakke'n jijjiirre.

21 Gibtsee boga'ni lumolla mambe'a yaanuwwa assa'n

insa'nee anjireemmaka Mageno deene.

22 Gibtse boga'ni asseemmaxxa mambe'a yaannuwwanna

Diimmoxxe abbaayya'ninna asseemmaxxa masoo yannuwwa deene.

23 Tennenaa'n kexxeeexxa Mageni arda ifika

biro'a mudhe'eemman;

yaane kinni Mageni fi'leemmak Muuse oddote'ni sa'eexxi

Mageni insa'nee mufeti birabaashsha

insa'nexxee Mageno soodate.✝

24 Mageniinka hiyyichcho addata gonpheemmaxxee'e

ookkonee eloka boga tuffante.

25 Ifi ifike dunkaane giddo he'neexxi adhdhumme;

Duuchchi Woddike Goottika hiyyichchonna lanqebaan.

26 Tennexxe qiilla gammoojje giddo insa'nee biraaxxa

anga iimi'a ke'iseexxi kakate.✝

27 Horte insa'nexxa duuchcha dharichcha mageno magenoofata'neeke ardixxe oddo'n xeere'naa'a

annafee boga'ni rennaashsha assaaxxa haaso'e.✝

28 Ookkonechchi uduma Mageniink ardi

Fegoori hiyyemaaba Ba'aali hiyyendaaxxa fakke magenoofate;

hedho affebaaxxe fakkuwwa'a

tolchemeeka maalanna inde.

29 Insa'ne fuggoxxe hunjenni Duuchchi Woddka Gootta mufachchiinse;

tennexxee'e fuggoxxi bala insa'ne'ni ibbe.

30 Yaane kinni Finihaasi ke'eexxi

balleessa hujeemmaka manna shiyyee wodda

dhukkubi ba'e.

31 Finihaasi asseexxa tenne eloxxa yaane ardi duuchchi wodda qaabbata'neemman,

edi'aanna daggaaxxi ila duuchchi wodda qaabbata'n hexxaan.

32 Meribaaxxe muumuwwaba

ardi Mageno muffachchiise;

insa'nenaa'n kexxeexxa Muuse'ni rakko gelte.

33 Insa'nenna yo'oshsha isoo muffachchiinseemmaxxee

Muuse hasisabaaka haaso'a afo'okenaa'ni fulchedhe.✝

34 Duuchchi Woddik Gootti insa'nee ajajeemmaashsha

dharichcha mageno magenoofatammaka arda birebaan.

35 Iittaanni gosa gosake ardinni welti karseemmeexxi

insa'neke galdumaxxa aada hordonfe.

36 Makeniink ardi wele ardixxa fakkuwwa magenoofate

tinninna insa'nexxe ba'ne'a buutote kadde.✝

37 Labbaxxana meyyaxxa ifixxa oose

Kanaanike bogike dharichcha magenuwwi'a tolchine.✝

38 Mitte balleessa affebaaxxa ifixxa labbaxxanna meyyaxxa oose shinnaa'naa

bogikinna mundeti batto'e.✝

39 Huje insa'nexxi insa'nee battoossite;

assineemmaxxi fuggoxxi yaanenna Magenokenaa'ni insa'nee gorsite,

40 Tennexxee Duuchchi Woddik Gootti arda ifike'n aare;

insa'neenna xireefate.✝

41 Wele gosake ardixxe anga'n insa'nee sa'isse uwwe;

naaphi insa'nekinna insaa'nee moye galche.

42 Naaphi insa'nee miica'naa

naaphii hunda yuukki hine galle.

43 Duuchchi Woddik Gootti arda ifika heddole anjireedheen;

yaane kinni insa'ne egenna'ninni iso'ni jallante;

tenni hunjeemmaxxi cubbo insa'nee salphisse.

44 Yaane kinni Duuchchi Woddik Gootti oo'naa wodda laqaamman;

rakko insa'nexxanna uudaamman.

45 Insa'nee gargaaro'a aageemmaxxa kako qaabbata'nemman

lumoxxe ifixxe jaalala'a hiyyeexxi insa'ne'aa o'wa'nemman.

46 Insa'nee miicaammak duuchchi

insa'ne'aa o'waashsha asse.

47 Ee, Duuchchi Wooddike Gootta no'oke Magenoo! No'oo anjir!

Atee galateeffantonnaa

woyyichcha summa atika saandonnaa

wele gosaxxe mootumma giddii'n

no'oo boga no'okibaa illee iima hiissi.

48 Duuchchi Woddik Gootti Isira'eelik Mageni

duuchchi woddi'a saademowwaal!

Ardi duuchchi hamiin hiyye;

Duuchchi Woddika Goottanna galateeffatte.✝