1 Duuchchi Woddike Gootti'a haaroxxa faaro farse;

buttate'n hexxineek ardi duuchchi, Duuchchi woddika Gootta faarot faarse.

2 Duuchchi Woddike Gootta faarse; isonna galateeffatte!

Isixxe anjiralummaxxa eloxxa oddonna hashshe soodaashshanni lasse.

3 Gosa gosake arda'n luminne isika ege'nishshe; arda duuchcha'ninna isixxa mambe'iinxa huje haasso'we.

4 Duuchchi Woddik Gootti lumoken; lumoxxi saadinnonna uwwendaaken; wele magenuwwanaa'n caala sodaatemeeken.

5 Wele gosa gosak ardi magenoofata'neek magenuwwi fakkuwwaten; Duuchchi Woddik Gootti kinni iimuwwa dade'eeken.

6 Qarqari isik ulfinnakenna gaachchanaken; hunnatinna danchumma galma isik giddo hexxeen.

7 Buttate'n hexxineke gosa gosake arda duuchchaa!

Isike ulifinnixxeenna hunnaxxee'e Duuchchi Woddika Gootta saadde.

8 Isike ulfichchi summi'a kadaaka galata Duuchchi Woddike Gootti'a shiqishshe; uwwatanna aaxxineexxi

isike galmixxe baxxebaa'a amme.

9 Woyyome'e gaachchanna afe'eeke Duuchchi Woddike Gootti'a kumbu hiyye;

butta duuchchik ardinna isi'a culphisowwaal.

10 Gosa gosake arda'n «Duuchchi Woddiki Gootti moyanjoken» hiyye!

Butta jabeessende kaasenddemmaxxee le'mitabaan; isi arda duuchcha'n dhugaati muraan.

11 Iimatinna butta gammaddowwaal! Abbaayyatinna ise giddo hedheechchi duuchchi illillisowwaal!

12 Fichchikinna giddo hedheek hiddichchuwwi duuchchi gammadowwaal!

Ookkone wodda gongomi giddixxi haqqe duuchcha gammadee faarsitaan.

13 Isi buttate'n muro'a dagaan; isi buttate'n qullumati, arduwwa duuchcha'ninna dhugaati muraan.