1 Duuchchi Woddiki Gootti moyanjoken; butta gammaddowwaal; ha'no abbaayyatixxi giddichchuwwa duuchcha illillisse.

2 Xilledhe'e raachcho'eek duumanchi isoo buqe'een; isi qullummatinna dhugaati moyaan.

3 Giira isi edo me'itaan; qarqara isike'n hedhemmaka naaphanna gubbaan.

4 Balaqi isik buttate'n ifise; buttatinna isoo uudeexxi culphisse.

5 Duuchchi Woddike Gootti edo

butta duuchcha gagatishsha baqqe.,

6 Iimmuwwa isixxa qullumma leellishshaan; gosa gosak ardi duuchchinna gaachchanna isika uudaan.

7 Fakkuwwagtee kumbu hiyyaakiirinna ise'ni ifi saadaakiir duuchchi salphataan;

ha'no dharchuwwi mageni Duuchchi Woddike Gootti'a kumbu hiyye.

8 Ee Duuchchi Woddike Gottaa! Atixxe toggitte murtexxee Tsiyoonik ardi gammadowwaal;

Yihudak qachchuwwinna illillisaan.

9 Ee Dada Duuchchike Duuchchi Woddike Goottaa! Ati butta duuchchike Magenon;

dharchuwwi magenuwwinna mootumma atixxi hunda hedheen.✝

10 Duuchchi Woddik Gootti fuggoxxa yaane gibaake manna eeyyaan;

qulliyyetixxa lubbonna heqqa'n insa'nee fuggaleeyyetixxe anganaa'ninna gatisaan.

11 Ifii'i qulliyyetee'e gammadikinna ba'lake manna'n dage.

12 Duuchchi Woddik Gootti asseexxe yaanexxee'e

qulliyye duuchcha gammade; woyyichcha isika summanna saadde!