1 Ee, Duuchchi Woddike Goottaa! Atinni haaso'aannen;

2 Ee, anke Magenoo! Ani atee addateennen

meenni shookonnowwaal;

naaphi anki ane'ni gammadoqqe'e.

3 Ate'ni adde assedhaak shookabaan;

shooki insa'ne geyaak

ati'ni addatemabaakeeranni.

4 Ee, Duuchchi Woddike Goottaa! Ora atika ege'nannoshsha assi;

ora atikanna anee barachchiisi.

5 Mageno ati anee anjirtattoke kaddeetaxxee

dhugaa atixxishsha galonna'aa anee barachchiisi;

ani hashsha barra adde assedhaannok atenden.

6 Ee, Duuchchi Woddike Goottaa!

Ati arda atika bire

hitta mararta'eetaxxanna eettaataxxa hedi.

7 Ee, Duuchchi Woddike Goottaa! Ati eloke kaddetaxxee,

shaqqunte atixxinni anee qaabat malee

anxa dargaggeeyyummatixxa cubbonna balleessa qaabbattoxxe'e.

8 Duuchchi Woddiki Gootti elokenna qullichchake kadeemmaxxee,

me'itaaka ifika ora

cubballeyye barachchiisaan.

9 Isi Shaqqaka manna toggichcha ora'ni akeekaan;

ora ifikanna insa'nee barachchiisaan.

10 Duuchchi Woddike Goottixxe kakoka ajaja ulfeesse heqedhaake manni'a

Isi assaxxi duuchchi jaalalatitinna dhugaatiten.

11 Ee, Duuchchi Woddike Goottaa! Atike summi'a hite'e,

yo'oshsha bira saxxeexxa anxa cubbo gattowwaal hiyyi.

12 Duuchchi Woddika Gootta sodataak manji ayyete?

Isoo Duuchchi Woddik Gootti me'a hassissaaka ora barachchiisaan.

13 Isi duuchchi wodda xoo'maamik hedhaan;

horte isixxinna boga dhaldaan.

14 Duuchchi Woddiki Gootti isoo sodaataake manni duuchchi'a godobixxe kulaan;

aageemmaxxa kakonna insa'ne egenaashsha assaan.

15 Duuchchi Woddike Gootti lekka anxa fonxorotenaa'n fulchaammaxxee,

ille anxi duuchchi wodda isiba'aaten.

16 Ani miicemeennekenna gargaaraaka afebenoken;

Ee, Duuchchi Wooddike Goottaa! Anba'a wirri hiyyi; ani'aanna maraar.

17 Rakko ane'ni bira saxxa'n me'ite'een;

abara duuchchanaa'inna anee gatisi.

18 Rakko anxanna abara anka uudi;

cubbo anxa duuchchanna gattowwaal hiyyi.

19 Naapha ank hittee qico bira sa'eexxa uudi;

hittee qico anee jibba'neexxanna uudi.

20 Anee heqqi; lubbo anxanna anjir;

atee gollake assedhennaxxee'e

anke naaphi edo anee'e shookkishshoxxe'e.

21 Ani addeti atee heqqedha'nexxee'e

qajelummatinna addatensha anee'e heqqitowwaal.

22 Magenoo! Isira'eelii'i

rakko isexxe duuchchanaa'n wodi.