1 Hallee luya

Duuchchi Woddika Gootta no'oka Mageno faaroti saada hittatta eloxxe;

Isoo saada gammachchiisaxxenna hassissaaxxen.

2 Duuchchi Woddik Gootti Iyyerusaalemii'i qammalchaan;

xexxeerememmaka Isira'eelika ardanna hiissaan.

3 Isi yaaddoti qalbe madooteekaara fayyisaan;

mada insa'neexxanna usura.

4 Isi urjuwwatike laakkossika qixxa ege'ne'een;

mitte mittenda summi summinninni ye'aan.

5 No'ok Dada Duuchchik Gootti lumoken; lumo qiconna hunnaameessaken;

beekkumi isikinna konnete hiyyemeexxi eg'nemabaan.

6 Duuchchi Woddik Gootti shaqqaka manna lummisaan;

fuggaaleeyye kinni butti'a hiissaan.

7 Duuchchi Woddike Gootti'a galatiinxa faaro faarse;

baganakanna gandinaa'n no'oka Mageno faarse.

8 Isi dhisendeexxa iima duumanchchik buqaan;

buttatee'e xeena uwwan;

koobuwwate'ninna arso latisaan.

9 Isi horekee'e itaachcho,

qophpheesa;

qodhandiinxi beltanuwwa cabuluqaa woda,

ittaachcho uwwaan.

10 Isi fadhadiinxe hunna'ni,

yookaan gongaake manjike jabeenne'n gammadabaan.

11 Yaane kinni Duuchchi Woddika Gootta isoo sodaataake manna'n

duuchchii woddixxe isixxe jaalala'ninna addata'neekeera'ni gammadaan.

12 Tee, Iyyerusaalemii, Duuchchi Woddika Gootta saadi;

Tee, Tsiyoonii Mageno atika lummisi.

13 Isi atixxe huluwwaka danqarisanjuwwa jabeessaan;

ati giddika ardanna eebbissaan.

14 Isi gabala atixxee nage'aa uwwa;

eloxxe dinnenninna atee goddisa.

15 Isi ajaja ifika butti'a erga;

hiyyichchi isikinna hirbange'n muuxema.

16 Isi kaade fuuttiinsha fawa;

qorrakanna bululiinsha xeera.

17 Isi kaade iimi'n kinuffa harcaasa;

isi ibiseeke qori edo ayyete dande'e uurraa?

18 Isi hiyyichcho ifika ergaa'naa kaadetinna baqqa;

diidallo ifixxanna diidalleessaan, itti kaadenna wode'e kaddeexxi yaata.

19 Isi hiyyichcho ifika Ya'iqoobixxe horte'n

seerakanna ajaja ifika Isira'eeli'n haaso'a.

20 Tennee'e wele gosa gosake ardi'a asse'eexxebaan;

insa'nenna seera sika egennebaan.

Hallee luya.