1 Ee, Duuchchi Woddike Goottaa fuggaaleeyye mannanaa'ni ane'e gatisi;

xaqartichcha mannanaa'ni anee heqqi.

2 Insa'ne godobi giddo fuggoxxe yaane hendaan;

duuchchi woddanna lola ke'isinaan.

3 Insa'nek arabi manjo dhudhdhuufiinsha iddaan;

haaso'i insa'neekinna buutetixxe ha'lashshaten.✝

4 Ee Duuchchi Woddike Gootta fuggaaleeyyetixxe anganaa'ni anee heqqi;

xaqartichcha mannanaa'ni,

anee ibiso'aa lekka anxa qaxxafo'a malaakenaa'ni gatisi.

5 Hollammeeyye fonxoro ani'a falte;

insa'ne wodaro sagarreexxi ani'a fanne;

me'anno ora'n qaxafa uggine.

6 Ee, Duuchchi Wodike Goottaa! Atee ani «Anke Magno» hiyyannon;

Ee, Duuchchi Woddike Gootta anxa oodhishsha laqi.

7 Ee, worba anjirallo, lumoke Duuchchi Woddike Gootta

loliinxa barra anee wontetishsha gollittette.

8 Ee, Duuchchi Woddike Gootta fuggaaleeyyetixxa halcha muuxxissoxxee'e

mala insa'neeka qajeelchitoxxe'e.

9 Anee qoqqobeexxi umo toggi asseeka manna

insa'neke afo'o'ixxi fuggo insa'ne'ne'ninni wirri hitowwaal.

10 Giiratik kashili insa'ne hana ibowwaal;

giira giddo,

yookaan fullabaaxxe bale

giddonna hunemmowwaal.

11 Manjo summa balleessaak

bogake'ni hedhoqqe'e;

xaqartichcha manna fuggoxxi isa'nee hordoffeexxi balleessitowwaal.

12 Duuchchi Woddik Gootti hiyyeeyyetee'e dhugaa muraaxxa,

rakkiyye mannika seeranna heqqisaaxxa ege'ne'eennen.

13 Qulliyye dhugaaten, atika summa saaddaan;

qajeeli manninna ati edo hedhaan.