1 Ee, Magenoo! Ati anke Magenon;

ani atee mitte godobinni halcheennen; xeena gopheexxi

Lameba wa'aa hiyyeemmake buttinishsha

lubbo anxi atee dheeboteen;

Aninna atee yora'eennen.

2 Atixxe woyyitte bakka'n atee afenne;

hunna atixxanna ulfinna atika uudenne.

3 Duuchchi woddixxi atixxi jaalala hedhotenaa'n midde

caaldeexxe kaddeemmaxxee'e afo'i ank atee saada'neen.

4 Hedhenneke baro duuchcha'n atee saadannon;

anga anxa atibaa ke'isee summa atika ye'edhannon.

5 Manji eloxxa ita iteexxi godde gammadammashsha

lubbo anxi ate'n gammaddaan;

afo'i ankinna gammada'n faaroti atee saadaan. 6 Ma'nanni hedhe'e atende qalli hiyyannon; hashsha duuchchanna atee hedannon.

7 Ati anke gargaarsanjo kaddeettaxxee boba atixxi hunda hedhee'e gammadiinxe faaronni atee faarsaannen.

8 Lubbo anxi ate'ni maxxande'een; atixxi middixxi anganna anee'e kiphphee abidde'een.

9 Anee shiyatee hasaak duuchchi hirreessa hundike'n sa'aan.

10 Insa'nenna bagedoke'n rennaan; jeedaluwwiinxe itanna kandaan.

11 Moyanji kinni Magenoke'n gammadaan; Mageniinke summinni kakataak duuchchinna Mageno saadaan; dhariyye kinni afo'o duuddaan.✝