1 Ee, Duuchchi Woddike Goottaa! Mufeti anee gandoxxe'e;

aaretinna anee'e mura woxissoxxee.

2 Mogiduwwi atiki anee'e ote'een;

anga atixxinna butti'a anee qe'wisse'een.

3 Atixxe aarenaa'n kexxeexxa bisi anki fayya afebaan;

anxe cubbonaa'n kexxeexxenninna micci mikiti ank duuchchi nage'a gopheen.

4 Cubbo anxi umo anki iimi darre saxxe'een;

ba'edha dande'abe'noxxe ba'oshshanna ane'n a'urte'een.

5 Gowwumma anxenaa'n kexxeexxa

anxi mada foole gande, malootte.

6 Hangulli hiyyenne; heeshshi hiyya'ninna me'enne;

barra duuchchanna oodhenne.

7 Hidhi anee'e giiratishsha gube;

bisi ank duuchchinna fayya gophe.

8 Hunna afebe'no; hara kurbu hiyyenne;

anke godobixee daaqanaa'n kexxeexxa aada'enne.

9 Ee, Duuchchi Woddike Goottaa! Halcha anxi duuchcha ati edo barrate;

aadino anxinna atenaa'n sho'ondeexxebaan.

10 Laphphe anixi yo'oshsha ga'nite;

hunnatinna ane'n hexxeba'a;

ille anxinna afa gophe.

11 Dhibo anxenaa'n kexxeexxa jaaluwwi ankinna firi anee maaxate;

olla'uwwi ankinna anenaa'n bayyate.

12 Hedho anxa balleesso'a halcha'emmakiir fonxoro ani'a faye;

anee'e miidho'a hede'emmakiirinna anee'e balleesso'a haaso'e;

barra duuchchanna insa'ne sobiinxa yaane ani'a mari'antaan.

13 Ani kinni mansha duuda manjishsha laqabe'no;

afo'okanna duudee manjishsha haaso'abe'no.

14 Dhugaanden, ani mansha laqabake duuda

dande'enna haaso'eexxi hiissichcho uwwabaake manjo kadenne.

15 Ee, Duuchchike Goottaa! Ani atete addatee heqedhannen.

Ee, Dada Duuchchike Duuchchi Woddike Gootta anke Magenoo! Ati hiissichcho ani'a uuttatton.

16 Ani «Naaphi ane'n mee gammadowwaal;

lekka anxi salaqqee'naa'a mee anee ooso'laashsha assi» hiyyeennan.

17 Ani'a iba malee maa gate?

Elaa gonphetinna anee haranga wocci assitebaan.

18 Ballessa anxee aadde aaggannon;

cubbo huja anxeenna yaade'enne.

19 Jajjabbi anki naaphi heddoke;

tolanga anee giba'neekiirinna birasa'eeke.

20 Eloxxa assennaxxa bado ani'a elobaaxxa assinaan;

eloxxe'n me'anno wodda anee'e garreeraan.

21 Ee, Duuchchi Woddike Goottaa! Anee waaldoxxe'e;

Ee, anke Magenoo! Anenaa'n bayyattoxxe'e.

22 Ee, Dada Duuchchike Gootta, anke anjiraloo!

Rakke'e anee gargaari.