Faarotikaa Maxaafa 7

Daawwit Biiniyaamichcho Kuushixxe buutonni Duuchchi Woddike Gootti’a faarseexxa faaro

Dhuga Hujendaashsha Shiqqeexxa Soodachcho

1 Ee Duuchchi Woddike Gootta anke Magenoo!

Ati anke gollan;

shorra’neeke naapha anke duuchchanaa’n anee anjirte’e gatisi.

2 Anjira gophphottole kinni Neeqishsha bunte ayyinna anee’e gargaarabaake booncho’n

anee ninniffee kukkuntaan.

3 Ee Duuchchi Woddike Gootta anke Magenoo!

Mitte manjo midde balleesoonnole,

4 Ani’a eloxxa assemmakee’e fuggoxxa asso’oonnole

naapha ankenaa’n tola boddichcha mulqedho’oonnole,

5 Naaphi anki shorre anee abixxowwaal;

anee gane’e reyanno qico’n hirbeessowwaal;

rensha ankanna bukote’ni gangalche salphisowwaal.

6 Ee Duuchchi Woddike Goottaa! Mufate’e qophphi hite ke’i;

mufeti daga’neeka naapha ankanna fuggussi;

dhuga dabbebaang toggi hite’e me’ito’a ajjajeeteshshanni

ane gargaartota’a qophphi hite ke’i.

7 Gosa gosaka arda ifi qarqara bukki assexxe’e

iimate’n hexxe’e insa’ne’n moyi.

8 Duuchchi Woddiki Gootti arda duuchcha’n muraan;

ee Duuchchi Woddike Goottaa! Anxe qullummashshanna anxee adatenshashshanni ane’n mur.

9 Hedumakanna godoba manjinka egendeeteke qullichcha Magenoo!

Fuggaaleeyyetixxa xaqaro balleessi;

qulliyye nage’ik ti’ni hite’e hexxashsha assi.✝7:9 Wal. 2:23.

10 Qajeelummati isi’a ergataaka anjiraak,

Mageni isi anxe wonten.

11 Mageni duuchchi Wodda fuggaaleeyyete’n muraakee

dhugaatike hayyichchan.

12 Fuggaaleeyye fuggoxxe hujenaa’n higa gophphoole

Mageni wolantichcha ifika qaraan;

mogido ifikaanna qixxeessaan.

13 Shiyaaka ifika lolinka miyanna qixxeessaan;

giiratishsha buba’neeka ifika mogiduwwanna qophpheessaan.

14 Cubbaaleeyye balleessa horatte’e,

xaqaro sii’lawite’e,

dhara ildaan. 15 Weleke fonxorote kaddashsha dhi’mo bale qontaan;

yaane kinni qonteexxe bale giddo insa’nende inba.

16 Welekee assinemmaxxi fuggoxxi yaane insa’ne’anni kaddaan;

xaqaro hunjemmaxxinna umo insa’nege’n higgaan.

17 Duuchchi Woddika Gootta qullumma isixxee galatefata’eennen;

Dada Duuchchike Duuchchi Woddike Goottike summi’a galatiniinxa faaro faarisa’eennen.