1 Isira'eelik allaalisanji, Yooseefixxa horte bobbaasatoke Magenoo!

Kiruubeelixxe oddo'n hexxexxe atixxe mootte'n ofoldeetekee!

Soodachcho no'oxxa laqi;

ifi atikinna ifowwaali.✝

2 Efireemikenna Biniyaamike gosat mine'ninna Minaaseke gosat mini edo leelli;

hunna atixxenni kexxee

daggee no'oo anjiri.

3 Ee, Magenoo! Edixxa jiro no'aa hiissi;

anjirremmonna'a mararte atixxa no'aa leelishshi.

4 Ee, Dada Duuchcha Ajajjatokee Duuchchi Woddike Gootta Magenoo!

Aatike ardixxe soodachcho'ni haani qco'ni aartatto?

5 Yaaddo insa'ne'n itisette, ha'wino'a indiddotanna bira sa'isite uutete.

6 No'oke qarqara'n hedheek gosa gosak ardi boga no'oka adhdhatee weli'aan weli lolemmaashsha assittete;

naaphi no'ok duuchchi no'o'ni gacifate.

7 Ee, Dada Duuchcha Ajajjatoke Magenoo edixxa jiro no'aa hiissi;

anjirremmonnaa'a alba atika no'aa ifi.

8 Ati woyyinetika hiddichcho Gibtsee'n iyyedagette,

gosa gosaka arda shorrite'e,

boga insa'neke'n isoo kaassette.

9 Ookkone boga isi'aa cirte gissittette;

isinna hidda butti'aa olteexxi,

boga ookkone'ninna wo'me.

10 Gaaddisi isik koobuwwa,

isixxe damek gaaddisinna lumollamma birbrissuwwa golle.

11 Dame isexxi Mediteranyaanxe abbaayya qico'n

kichchuwwatinna Efiraxisike galaani qico'n daaldee.

12 Atike woyyinetike hiddichchonaa'n dalla'a diigee'naa

ora ookkone sa'aaki manji duuchchi gummichcho isinaa'n mayee'e qocedha?

13 Booyyuwwa isoo hirbeesitaan;

Weli biniichchuwwinna isoo itaan.

14 Ee, Dada Duuchcha Ajajjatoke Gootta Magenoo!

Ati no'obaa wirri hiyyi;

iimi'n butti'a no'obaa uudde afi;

konnee woyyinetika hiddichchonna heqqi.

15 Atixxe middixxe anganni,

Kaalsiteteka konnee golqo

ifi'anna nossexxeteka woyyinetika hiddichcho heqqi.

16 Isoo naaphi no'ok kukkute giirate'ni wore'een;

Magenoo mufe atixxenni insanee uudde'e balleessi.

17 Middixxe anga atixxi giddo hedheeka,

ifi'a jabeessitetteka manjo anga atixxi isoo heqqitowwaal.

18 Ta'anni eliqi'a atenaa'ni udumi'a hingabbe'non;

lubbo calla no'oo uggi;

atee galateefanta'n he'nannon.

19 Ee, Dada Duuchcha Ajajattok Duuchchi Woddike Gootta Magenoo! Edixxa jiro no'aa hiissi;

anjirremmonna'aana alba atika no'aa ifi.