1 Ee, Magenoo! Soodachcho anxa laqi;

kadha anxanna gibboxxe'e.

2 Ani'a hee hiyyi; hiissichchokanna ani'a uwwi;

yaadik weekeme'ennen; fajjisemeennen.

3 Naaphiinke haaso'inni weekemeennen;

fuggaleeyyetixxe dhaadachcho'aanna alayyeenne;

Insa'ne ane'n rakko iyyedangeen;

aareti ane'ni ke'ne'e naaphake ane'ni kandeen.

4 Qalbe anee dhiqqisse;

reyotika alayyonna alayyenne.

5 Alayyenna roqonsenne;

lumo qiconna culphisenne.

6 Guugenjotishsha keela afe'eennele,

phirri hiyye me'ee hafuura adhannan,

7 Silaa bayyi'a me'ee

qiilla gammooje giddo hekki hiyyannan.

8 Hobonbaltetenaa'ninna diidallotike soranaa'n

baaje'e gollatannobaa silaa rakkee me'annan.

9 Ee, Dada Duuchchike Gootta

qachchi giddo xaqarotanna weli itaa uude'eennaxxee'e

fugaaleeyyetixxa mari'e balleessi, afo'o insa'neeka gorsi.

10 Hashsha barra insa'ne qachchiinke dalla'i hana doonaan;

Xaqarotinna rakko qachchi giddo wo'miteen;

11 Qachchi giddo ba'nete hexxeen;

qachchiinxe weldeenna duuchcha'n manjo miicanna manjo soba gophendeebaan.

12 Anee yowwa'neek naaphaakebaan

naaphake kadeele silaani ossannan;

ane'ni umo duka'neek diina ankebaan;

diinake kadeele silaan isi edii'n sho'omannan.

13 Yaane kinni tennee assittetek ateten,

atee hari'a anxe,

jaalo ankenna yo'oshsha welti shiqanoke,

14 atinni welti xe'maaka haaso'a haasonna'ni

Mageniinke galmi giddo ardinni welti me'ineennaken.

15 Fuggoxxi insa'ne giddonna mine insa'neek giddo hexxeemmaxxee

keekatebaang reyo naapha anke'n daggowwaali

lubbondinni he'ne hirreesa hundike'n sa'numadu.

16 Ani kinni Mageniinbaa soodata'eennen;

Duuchchi Woddiki Goottinna anee anjiraan.

17 Hashsha barranna saafo'a rakko anxa iso'n ku'lanon;

isibaa oodhannon; isinna hafuura anka laqaan.

18 Ane'n ke'eek manni heddoke kadeemmaxxee

isi insa'nenaa'n lubbo anxa nage'ik wodaan.

19 Insa'ne me'aa ifixxa jijjiidha gonpheemmaxxee

Mageno sodaata gonpheemmaxee

olminaa'ni mootet hana hedheek Mageni soodachcho anxa laqeexxi insa'nee salphisaan.

20 Ank jaalli ifika jaalluwwa lole;

kakateemmaxxa kakonna diige.

21 Afoo'i isik buuroken;

godobi isik giddo kinni bagedoke hedheen;

haaso'i isik zayiteti caala shaqqaken;

yaane kinni goshemeeke wolaantichchan.

22 Ate'n a'urteexxa yaane Duuchchi Woddike Gootta'n wocci assi;

isi atee kiphe abidaan;

qullichcha manjonna haranga guggufato'a waalabaan.

23 Ani kinni ee, Magenoo! Ate'ni addata'eennen;

fuggaaleeyye ba'netixxe bale giddo ibissatton;

manjiinxa lubbo shiyaammakiirinna sobaaleessi manni ifixxe hedhoka gamisa baronna hedhabaan.