1 Oodhishsha anxa laqemmaxxee

ani Duuchchi Woddika Gootta eeyyaannen.

2 Isoo yee'edhanno wodda laqa'eemmaxxee

hedhannoke baro duuchcha'n isibaa raarannon.

3 Reyotixxi fonxoro anee abide

hirreesiinxe yaaddoxxi ciiniintonna ane'ni dagge;

rakkotinna yaaddo anee injiffatte.

4 Ookkone wodda, «Duuchchi Woddika Goottaa

lubbo anxa anjirtota'a atee soodata'eenne» hiyyenne;

Ee, Duuchchi Woddike Goottika summa ye'edhenne.

5 Duuchchi Woddik Gootti ba'lakenna qullichchaken;

No'ok Mageni o'wi calliken.

6 Duuchchi Woddik Gootti shaqqaka manna heqqaan;

lumo qico rakkate'naa'a ane'e anjireen.

7 Tee anxe lubbo enqexxe hafuura adhdhi;

Duuchchi Woddik Gootti eloxxa ati'a asse'eeken.

8 Ee, Duuchchi Woddik Gootti lubbo anxa reyotenaa'n

ille anxa indiddotenaa'ni,

lekka anxanna gugguffachchotenaa'ni gatise'een

9 Tennexxe hedhoke mannike boga'n

Duuchchi Woddike Gootti edo mammarema'eennen.

10 «Yo'oshsha rakkateennen» hiyyennexxa yanna midde

addateennen.✝

11 Alayyokenaa'ni kexxeexxa

«Manni duuchchi dharichchaken» hiyyenne.

12 Ani'a asseexxe duuchchi'a

Duuchchi Woddike Gootti'a bado maa hissanno?

13 Anjiretixxa buuda iimi'a abidannon;

Duuchchi Woddike Goottika summanna ye'edhannon.

14 Isike ardi duuchchi edo

Duuchchi Woddike Gootti'a weereega anka muuxannon.

15 Qulliyyetixxi reyo Duuchchi Woddike Gootti edo

ulfaate'eexxen.

16 Ee, Duuchchi Woddike Gootaa, dhugaaten, ani atike erganjon

ani atixxe garbitek belti atike garbichchan;

haachchabiinke usurnaa'n anee tikkeeten.

17 Ani ati'a galatiinka tolcha uwwannon;

Duuchchi Woddike Goottika summanna ye'edhannon.

18 Isike ardixxe bukki edo

Duuchchi Woddike Gootti'a weereega anka uwwannon.

19 Tee Iyyerusaalemi tennexxee ati giddo

Duuchchi Woddike Goottike minixxe baxxe'n assannon

Hallee luya.