1 Ee Duuchchi Woddike Goottaa! Maaye'e bayyattette?

Rakkoti baro mayye'e no'oo maaxaffattete?

2 Fuggaaleeyye ifi saadati hiyyeeyye rakkissaan;

mannakee fonxorremmaxxi fonxoro insa'neenni abidowwaal.

3 Cubbaaleessi manji fuggoke ifike heduuma'n hollaan;

Duuchchi Woddike Goottaa! Ifi calla hedammaki manni

atee gibaan; atenna yowwaan.

4 Fuggaaleeyye Duuchchi Woddik Gootti haba gaate hitabaan; holitammaxxee

Mageni hedhebaashsha heddaan.

5 Fuggaaleessi manji'a yaane duuchcha qajeelidaan; kado malee kinni Mageniike

seeranaa'ini bayyate'eeken; naapha isikanna tuffataan.

6 Godob giddo «Ayyinna bakka anxenaa'n annee le'misaaki hedhebaan

rakkote hiyyemaangchi ane'n geltebang duuchchi wodda gammada'nee hedhannon» hiyyaan.

7 Haasso'i isiki giddo yowwichchi, dharinna manjo miidha gophendaabaan;

xaqarotinna fuggoxxa haaso'a afo'o isikenaa'n ibbabaan.✝

8 Olla'i olla'i giddo sho'emee gadaan;

baassaka afebaaka manna balleesso'a heqqedhaan;

balleessa afebaaka manna qoonnete'n shiyaan.

9 Baada'a golledhe gaadammake neenqishsha sho'ome turaan;

baassaaka afeebaka abido'a dabba'le gaadaan;

hiyyeeyye fonxoro ifixxeninni abidenna harkisaan.

10 Isa'nee ganeexxi ifi hunda ibilsaan;

baassaaka afebaaki manninna injifatemee anga isixxe'n ibaan.

11 Cubballeessii godobi giddo, «Anee Magen dedhe'een;

ille buqedhe'een; haranga anee afabaan» hiyyaan.

12 Ee Duuchchi Woddike Goottaa qophphi hitte'e ke'i! Magenoo hunnameete anga atixxa ke'issi;

baassaaka afebaaka manna deettoxxe'e.

13 Fuggichchi manni Mageno maaye'e tuffata?

Mayeete godob giddo «Magen no'oo xixabaan?» hiyyachchi?

14 Ee Magenoo, ati kinni rakkateekanna yaadeeka uuddetexxi

gargaartota'a qophpheeffattaton;

rakkiyye ate'n irkattaan;

Atinna annanna ama affebaaxxa oose gargartatton.

15 Fuggaaleeyye mannixxanna cubbaaleeyye mannixxa hunna enqi;

ta'an eliqi'a fuggoxxa assinabaashsha,

assinnemmaxxe fuggoxxee insa'nee gan.

16 Duuchchi Woddiki Gootti duuchchi woddi'a moyanjoke kadee hedhaan;

wele magenuwwa magenoofataak arduwwi kinni

buttatenaa'n ba'aan.

17 Ee Duuchchi Woddike Goottaa, ati micemeeke mannixxa soodachcho laqatton;

oodhishsha insa'neexxanna caqassee insa'ne'e jajjabesittatton.

18 Buttate'ni hedheek manjiink belti

ta'aann elqi'a wele miicabaashsha

ati anna ama afebaakenna miicemeeke manni'a baassittatton.