1 Ee Duuchchi Woddike Goottaa soodachcho anxa laqi;

kadha anxanna caqasi

Xuurammeessumatinna qulluma atixxenni laqqe'e hiissichcho ani'a uwwi.

2 Ati edo ayyinna qulichchi hedha gophemmaxxee'e

anee erganjo atike'n murtoxxe'e.✝

3 Naaphi anee shiyo'a shorre;

hedho anxa butta ibise;

edo reyeeke mannishsha

dukkana giddo ofo'lannoshsha anee asse.

4 Tennexxee yaadi ankinna ani giddo wexeqeme

godobi anee alaye.

5 Bireka baro qaabbatannon;

huje atixxa duuchcha hede herregee

atixxe angaxxa hujenna higgeggeenni hedannon.

6 Anga anixxanna atibaa farri asseennen;

bago bogishsha

lubbo anxinna atee dheebotte.

7 Ee Duuchchi Woddike Gootta rekke ani'a hiissichcho uwwi;

Bale giddii'a me'ammake mannishsha kadannon;

Alba atika aneenaa'ni sho'exxoxxe'e.

8 Ani atee addateennaxxee'e

duuchchi woddixxa atixxa jaalala gorsa gorsa ege'nannoshsha assi;

anxi lubbo atee addatamaxxee'e

me'annoka ora ani'a leellishshi.

9 Ee Duuchchi Woddike Goottaa ate'ni gollateennaxxee'e

naapha ankenaa'ni anee gatisi.

10 Ati anke Mageno kaddetaxxee'e

fedhii atixxa muuxonna'a anee barachchiis;

atiki elok hafuuri qajeela ora'n anee akeekowwaal.

11 Ee Duuchchi Woddike Goottaa summa atikee hite'e

Hedhoti anee uggi;

Qullumma atixxenni lubbo anxa rakkotenaa'n fulchi.

12 Atixxe duuchchi woddixxe jaalala'a

naapha ankanna biri;

Ani atike erganjo kadennaxxee'e

diina anka balleessi.