1 Cubbichcha manjo cubbo, godobi giddo afe'eeka fuggichcha yaada caqasaashsha assitaan;

Magno soda'atinna isiba hexxebaan.✝

2 Isi ifi yo'oshsha sobaammaxxee

balleessa ifixxa ege'ne'e, isee jibbabaan.

3 Isike afo'inaa'n fulaak haaso'i fuggokenna dharaken;

qalbeeffachchotanna eloxxa assa waale'een.

4 Isi ma'nanni hedhee'e fuggoxxa hedaan;

cubbotike ora'ninna me'aan;

elobaaxxenaa'n bayyatabaan.

5 Ee, Duuchchi Woddike Goottaa, jaalala atixxi iimuwwate'n,

addatensha atixxinna iimatike duummanchi qico'n geltaan.

6 Qullumma atixxi lumollamma koobuwwashsha

dhugaa mura atixxinna abbaayyatishsha dhi'moten;

Ee, Duuchchi Woddike Goottaa ati hore manjo biiniinchakenaa'ni ba'attatton.

7 Ee, Magenoo! Atixxi jaalala hittatta manbe'iinxe;

manjiink belti duuchchi atike keelike gaaddisa'ni gollataan.

8 Atike minnika corba insa'nee'e itissatton;

atixxe gammashshoke lagika wodde'enna insa'nee ha'wissatton.

9 Hedhotixxi muumme atete kaddeettaaxxee

ifa atikenni ifa uundannon.

10 Atee'e ege'neeke mannanaa'n jaalala atixxi,

godoba ba'lake manni'aanna qullumma atixxi qoottoqe'e.

11 Hollaammeeyyetixxi lekka anee haxxaashsha,

Fuggaaleeyyetixxi anga anee shorritashsha assitoxxe'e.

12 Fuggoxxa assaakiiri hitta ibeexxanna wabbi hiyyeexxa,

adadeenna darbeme'e ke'a dande'ebaa qico uudi.