Mageniinkaa Manjo Muusexxa Soodachcho.

1 Ee dada duuchchike Goottaa!

Ati ilatenaa'ni ilati qico'n no'oke golla kadde'eeten.

2 Koobuwwa bakka ifixxe'n ilendebaang,

bogakanna butta duuchcha dadebexxo edi darre

duuchchii woddanaa'n duuchchii woddi'a ati Magenoken.

3 Ati, «Koo manjiinke beltoo buttinange'ni higi» hitatton,

manjokanna wirri assitee'e buttiniinbaa'a hiissittatton.

4 Kuma wogga ati edo

saxxeexxe bereqixxe barrashshaten;

iittan suukii'i hashshixxishaten.✝

5 Ati manjo lola'iinsha filte hoyyittato wodda,

insa'ne oojjotishsha sa'naan;

insa'ne gorsa gorsa qokki hite'e latammaxxe badda'ashshaten.

6 Badda'a gorsa latteexxi quffaan;

galgalo'a wodda kinni lunbu hitee'e qoortaan.

7 Mufe atixxi no'o balleessiteen;

aare atixxinna no'o'o alalshiteen.

8 Ati balleessa no'oxxa ifi edo,

sho'nennexxi hunjennexxa cubbonna atike albike ifi edo uggittatton.

9 Bari no'oki duuchchi no'o'n muffata'naan mude;

wogga no'oxxanna foo'lati bidhdhinnannon.

10 No'oxxe hedhok bari torbaane tomme woggan,

bira sa'oole sadeeta tomme woggan;

ise giddo bira sa'xxaaxxi rakkotenna yaadoten;

isenni rakke saxxaan; no'onna sukuti hinnannon.

11 Atixxe mufexxa hunna ayyete ege'nee?

Ati'a hasisaake ulfinishshanni aare atixxinna jabaxxen.

12 Beekuma qalbetika anfannoshsha

bari no'ok hittee qico harumaake kadeexxa no'oo barachchiis.

13 Ee Duuchchi Woddike Goottaa! Higi;

tinni haani qico'ni kadda?

Erganjuwwa atikeenna o'wi.

14 Baro no'oke duuchcha'ni gammanda'ni illillisannoshsha

gorsa jaalala atixxenni no'oo goddisi.

15 Rakko no'oo uudisseteke barixxe qixxe'ni

fuggoxxi no'o'ni gelteeke sannixxe qixxe'ni

no'oo gammachchiisi.

16 Huje atixxi erganjuwwa atike'ni

gaachchanni atikinna insa'nexxe oose'n leellaashsha assi.

17 Dada duuchchike Gootta no'oke Magenixxi elle no'o'ni hexxowwaal;

isi no'oxxe angaxxa huje no'aa qatansowwaal;

ee no'aa qatansowwaal.