Faarotikaa Maxaafa 115

Magenokee Hasisaaka Galata

1 No’oxxeete kaddebaangi Ee, Duuchchi Woddike Goottaa no’oxxeete kaddebaangi

atixxe duuchchii woddixxe jaalalaxxeenna atixxe xuurameessummaxxe’e

abbo summa atikee gaachchanna uwwi.

2 Gosa gosaki ardi

«Mageni insa’neek haba hedhe» maayee hiyya?

3 No’ok Mageni iima hedheen;

isoo eeyyisaaxxa assaan.

4 Insa’nexxi fakkuwwa kinni manjiinxe anganni

giissemeechchuwwa biretike sibiljonna worqen.

5 Afo’o afe’eengeechchuwwan kinni haaso’aachchuwwaba’a;

ille afe’eengeechcuwwaan kinni afaachchuwwaba’a.

6 Mansha afe’eengeechchuwwan kinn laqaachchuwwaba’a;

sano afeengeechchuwwan kinni ulataachchuwwaba’a.

7 Anga afeengeechchuwwan kinni qaqqabaachchuwwaba’a;

lekka afeengeechchuwwan kinni tarkafataachchuwwaba’a;

bucuqqi hiyyenna laagadik haaso’aachchuwwaba’a.

8 Konnechchuwwa giisaakiir, konnechchuwwa’n addataakiir duuchchi

konnechchuwwishshan kadowwaal.✝115:8 Far. 135:15-18; Wal. 9:20.

9 Koo ha’no Isira’eelike arda Duuchchi Woddike Gootta’n addatte;

gargaaraakinna wonte ha’nooxxi isoten.

10 Mageniinxi qeese, Aaroonik mini hadi Duuchchi Woddike Gootta’n addatte;

gargaaraakinna wonte hanooxxi isoten.

11 Ha’no Duuchchi Woddika Gootta sodaatinaak

Duuchchi Woddike Gootta’n addatte;

gargaaraakinna wonte hanooxxi isoten.

12 Duuchchi Woddik Gootti no’aa hedaan; no’oo eebbisaan;

isi Isira’eelika arda eebbisaan;

Aaroonika mini haddonna eebbisaan.

13 Duuchchi Woddika Gootta sodaataka duuchcha

lumo shiixooka eebbisan.✝115:13 Wal. 11:18; 19:5.

14 Duuchchi Woddik Gootti ha’noonna oose ha’nooxxa

eebbise’e bira sa’iso’o.

15 Iimanna butta dadeek Duuchchi Woddik Gootti

ha’noo eebbiso’o.

16 Iimuwwa Duuchchi Woddike Goottixxen;

butta kinni manjiinke belti’a uwwe’een.

17 Duuchchi Woddika Gootta galateefataak reyeeke mannabaan;

haasonnabaaba hirreessi gidi’anna sa’aake mannabaan.

18 Ta’anaa’n duuchchi woddi’a

Duuchchi Woddika Gootta galateeffantannok no’oten;

Duuchchi Woddik Gootti eebbisemowwaal.