1 Eloke kadeemmaxxeenna arda duuchchii wodda eeyya'eemmaxxee

Duuchchi Woddika Gootta galateeffatte!✝

2 Duuchchi Woddik Gootti anjireek

naaphiinxe anganaa'ninna fulcheemmak duuchchinna tenneenni hiyyowwal.

3 Boroti'ninna dhidhimi darre'ni

midii'inna bita'ii'ni,

bogi bogii'ni bukki asseekiir tenneenni hiyyowwaal.*

4 Mitti mitti qiilla gammoojje giddo doonsa kiyya hiyya'n rakkate

he'naake qachchiba'a iyyemaraaka

ora haanke.

5 Dheebo'wine solo'wineemmaxxee

insa'nee lubbo fula gelte.

6 Insa'nenna rakko giddo he'ne'e Duuchchi Woddike Goottiba'a oo'ne;

Isinna abarakenaa'n insa'nee anjire.

7 He'naake qachchiba'a

insa'nee toggichcha ora'ni akeeke.

8 Duuchchi Woddika Gootta isixxe duuchchii woddixxe jaalala'a

manjiinke belti'a asseeke mambe'uwwi'aanna galateeffantowwaal.

9 Isi dheebo'weekaara dheebo fulche'eeken;

solo'weekaaranna heddo elola yaanenni goddise'eeken.

10 Insa'ne giddii'ni mitti mitti dukkana dimmi giddo

haachchabik usureemme rakkateemman.

11 Tinni duuchchi insa'ne'ni gelteechchi Dada Duuchchik Duuchchi Woddik Gootti Mageniinke

hiyyichcho'n jallanteemmaxxee,

gorsa isikanna tuffanteemmaxxeeten.

12 Tennexxee jabaxxe hujenni insa'nee selli asse;

insa'nee gargaraak hedhemabaan; guggufanitenna inbe.

13 Rakko giddo he'ne'e Duuchchi Woddike Goottibaa oo'ne

isinna abarakenaa'ni insa'nee anjire.

14 Dimma dukkana giddii'n insa'nee fulche;

usureemmeemmaka haachabanna tanshe.

15 Duuchchi Woddika Gootta isixxe duuchchi woddixxe jaalala'a

manjiinke belti'a asseke mambe'uwwi'aanna galteeffantowwaal.

16 Isi saagetotike sibiljika cufanuwwa butuchche'een,

sibiljiinka danqarisanjuwwanna kukkute'een.

17 Mitti mitti xaqarotenaa'n kexxeexxa doode;

seera sa'atenaa'ni kexxeexxa rakkate.

18 Ita duuchcha insa'nee boshshe;

reyanna shinqe.

19 Rako giddo he'ne'e Duuchchi woddike Gottiba'a oo'ne;

isinna abarakenaa'n insa'nee anjire.

20 Hiyyichcho ifika insa'ne'n haaso'eexxi,

hirreesiinxe balenaa'ninna insa'nee gatise.

21 Duuchchi Woddika Gootta isixxe duuchchii woddixxe jaalalaxxee

manjiink belti'a asseeke mambe'uwwi'aanna galateeffantowwaal.

22 Insa'ne galatiinka tolcha isi'a shiqinshowwali;

asseexxaranna gammachchiissaaxxe faaronni haasonnowwaal.

23 Mitti mitti markaba gulufe'e abbaayatti hana me'e;

ba'lake wodi'i hananna dadda'la'nemman.

24 Insa'nenna Duuchchi Woddike Goottixxa huje,

dhi'mo abbaayya giddonna asseexxa mambe'a yaanuwwa uunde.

25 Isi ajajee wodda hobonbalte kexxe;

danbala'ikinna wode'e raase.

26 Markabiink manni hobonbalteti iimi'a darbeme;

dhi'moti giddii'aanna wirri hiyye hige;

rakkotenaa'ni kexxeexxinninna alayye qexerri hiyye.

27 Machcho'eeke manjiinsha bogi insa'nenaa'ni ba'ee'naa gatantarre;

ege'naa insa'nenaa'n baxxee'naa assinaanxa gonphe.

28 Rakkoti giddo he'ne'e Duuchchi Woddike Goottiba'a oo'ne;

Isinna abarakenaa'n insa'nee anjire.

29 Hobonbalte ca'li asse;

danbala'akanna sammi asse.

30 Sammi hitteemmaxxeenna gammande;

genno'a halchinnaamake abbaayyati qarqarba'aa geessise.

31 Duuchchi Woddika Gootta isixxe duuchchi woddixxe jaalala'a

manjiinke belti'a asseeke mambe'uwwi'aanna galateeffantowwaal.

32 Bukki hiyye'eeke ardi giddo isoo kubbinsowwaal;

galchaammake mannixxe songo'ninna isoo'o saandowwaal.

33 Duuchchi Woddik Gootti galaana qiilla gammooje'n

muummuwwatanna bago boga'n jijjiire.

34 Ookko hedhaammake mannixxe fuggaaleesummanaa'n kexxeexxa

shamoka boga maxinetike boga asse.

35 Qiilla gammoojje baleesuwwiinke eela'n,

bagoka boganna muummuwwate'n jijjiire.

36 So'lo'weeka arda ookko iyyedage;

insa'ne'aanna he'naaka mine ijaare.

37 Insa'nenna fichchake'n huccine; woyinetanna kaanse;

misse'eexxa midhanna aasse'ne.

38 Insa'nee eebbise;

insa'nenna horre bira sa'ne;

insa'neke horki laakkossinna shiixxedhabaashsha asse.

39 Miicamik, rakkotinna yaaddoti

laakkossi insa'neek shiixxedhee'naa'a salphante'eemman.

40 Isinna ja'laabuwwake'n salphine ibise;

qiilla gammoojjeke maanchi giddonna doonsa kiyya hinaashsha asse.

41 Rakkiyye kinni abarakenaa'n fulche;

insa'neka mini hadonna horiinsha bira sa'isse.

42 Tennee uudeexxi qulliyye gammadaan;

fuggaaleeyye kinni shookee'e afo'o abixxitaan.

43 Beekake kadeek duuchchi tennee qalbeeffatowwaal;

isinna Duuchchi Woddike Goottixxa duuchchii woddixxa jaalala hubatowwaal.