Faarotikaa Maxaafa 6

Faarsaleeyyetike akeekisanji’a baganik faarsendaaxxa Daawwitixxa faaro

1 Ee Duuchchi Woddike Goottaa mufet anee gandoxxe’e;

aaretinna anee xixxoxxe’e.

2 Ee Duuchchi Woddike Goottaa! Hunna gopheenneni ani’a marar;

micci anki duuchchi gilgile’een ballo anee fayyisi.

3 Ee Duuchchi Woddike Goottaa!

Hedho anxi duuchcha yo’oshsha rakkate’een;

haani qici’aateta iitta kada’ni hedhaannek?

4 Ee Duuchchi Woddike Goottaa! Anba’a higge’e hedho anxa wodi;

yo’oshsha anee eettaattaxxee anee anjir.

5 Reyemmake manni giddii’n ke’exxi atee qaabataak hedhebaan;

hirreesi giddo moogemeeba hedhe’e atee galateefataak hedhebaan.

6 Yaadotixxe bira sa’nenaa’ni kexxeexxa gophe’eennen;

oodhishatixxe bira sa’nenaa’ni kexxeexxa hashsha hashsha’inni indiddo ma’na anxa

coo’mi assiteen;

boraate anxinna corco hiteen.

7 Naapha ankenaa’n kexxeexxa

yo’oshsha oodhenaxxee ille anxi garjite afa gophphe.

8 Duuchchi Woddiki Gootti oodhishsha anxa laqe’een;

tennexxee ha’no fuggoxxa halsitinaak anenaa’n bayyatte!✝6:8 Mat. 7:23; Luq. 13:27.

9 Duuchchi Woddiki Gootti oodhishsha anxa laqe’een;

soodachcho anxeenna hiissichcho uwwaan.

10 Naaphi anki shookaan;

dedhange’n salphatenna udumi’a higaan.