1 Ani «Arabbo ankenni cubbo haaso'abe'noshsha

ora anka heqqedhanno;

fuggaaleessi manninna ani bira hedhee qico'ni

afo'o ankanna bixaa'lanno» hiyyenne.

2 Afo'o duudee manjishsha sammi hiyyenne;

eloka haaso'anna midde haase'ebe'no;

kaddo malee abari ane'n bira sa'a'n me'e.

3 Godobi anee gubatte;

hede herganno woddanna giiratinna ani giddo talli hite;

ookkoneechchi uduma haaso'a safenne.

4 «Ee, Duuchchi Woddike Goottaa! Anxe Hedhoka muuxama, anke barrika laakkossanna ane'n ege'nishshi;

bari ankinna rake'e sa'aneeke kadeexxa ege'no.

5 Kunse, baro anka taakkoti qicike assittette;

wogga anxinna ati edo maachchonnabaan;

dhugaaten, manji duuchchixxi hedho shuu hite'e saxxaammaxxe diidallon.

6 Dhugaaten, manjii gaaddidotishsha sa'aan;

tolange elo'aan;

ayyi'aa kaddaaxxa afebaang karra tuulaan.

7 «Ee, Dada Duuchchike Goottaa! Ta'ata ayyete uuxxedhanno?

Adde anxi ate'nten.

8 Cubbo anxe duuchchanaa'n anee anjir;

gowwooletixxe gacifachchoke anee assitoxxe'e.

9 Iitta rakkatannoshshaa assittettek atete kaddeetaxxee'e,

sammi hiyyannon;

mittelchonna haaso'abe'no.

10 Gane atixxi anee miitee'e shaqqishshe'een

anga atixxa anenaa'n hoyyedhi.

11 Manjo hujeexxe cubboxxee mura woxisee'e xixxatton;

karra isixxanna ooloti itemaachcho assittatton;

dhugaaten, manji duuchchi shuu hitaammaxxe diidalloxxen.

12 «Ee, Duuchchi Woddike Goottaa! Soodachcho anxa laqi;

oodhishsha anxa caqasi;

indiddo anxanna uuda gibbexxe'e;

ani ati edo keessummaten;

edike anke annuwwishshanna orimaroken.

13 Illee iima higabe'nobaa reyennexxi me'ebe'no edi darre

higgeenni gammadonna'a ille atixxa anenaa'ni hoyyedhi.»