1 Ee anke golla Duuchchi Woddike Goottaa!

Atete ye'edhaannen, sammi hitoxxe'e

sammi hittotole ani reyemmake manninni qixxeten.

2 Atike yo'oshsha Woyyichcha Galdumibaa anga anxa ke'isennexxi

gargaartota'a ate'n oodhanno wodda maganneten soodachcho anxa laqi.

3 Fuggoxxa assaake xaqaritichchi manninni welti anee adhdhitoxxe'e;

insa'ne olla'ik eloke afo'o haasonnaan;

godoba insa'nek giddo kinni fuggoxxe uggudhine'een.

4 Huje insa'neexxishshanni,

assineemmaxxe fuggoshshanni hira insane'a uwwi;

Anga ifixxenni hunjeemmaxxe hujeshshanni insa'nen mur;

hasisaa qiconna insa'nee xixi.✝

5 Duuchchi Woddik Gootti asseexxinna dadeexxi insa'ne'n mittechchonna laba gophpheemmaxxee

Mageni insa'nee butuchchaa malee'e qammalchabaan.

6 Soodachcho anxa laqeemmaxxee

Duuchchi Woddiki Gootti saademowwaal.

7 Duuchchi Woddiki Gootti hunna anxenna anxe wonten;

anee gargaare gammachchiisemmaxxee isoo addataannen;

faarotinna isoo galateeffataannen.

8 Duuchchi Woddik Gootti arda ifikee hunnaten;

hariire'e moosiseemmake moyanji'aanna anjiratike gollan.

9 Magenoo arda atika anjir;

karra atixxe kadeeka mannanna eebbisi;

Allaalsanjo insa'neke kaddettexxi duuchchi woddi'aanna insa'nee ba'edhi.