1 Anke Magenonnaa anke moyanjoo!

Ani lumminne atika haaso'annon;

summa atikanna duuchchi woddi'a saadannon.

2 Bara bara'ni atee saadannon;

summa atikanna duuchchii woddi'a saadannon.

3 Duuchchi Woddik Gootti lumoken;

lumo qiconna saademaaken;

lumminee isikanna qorqorreexxi dhaqqanbaba'a.

4 Mitte ila, itti aandaaxxe illa'n atixxa huje saaddaan;

atixxa mambe'iinxa hujuwwanna lallabbaan.

5 Insa'ne atike gaachchannixxe danchumaxxanna atike uulfinnixxa haassonnaan;

aninna atixxa mambe'iinxa hujuwwa hige higee'e hedannon.

6 Insa'nee atixxe mambe'iinxe hujexxa hunna haassonnaan;

aninna atika lumminne odeessannon.

7 Atixxe arjummaxxe bira sa'nexxee'e jila jilaani;

atixxe qullummaxxeenna illillisati faarsinaan.

8 Duuchchi Woddik Gootti arjakenna o'waaken;

mufe dande'aakenna jaalala isixxi bira saxxeeken.

9 Duuchchi Woddik Gootti duuchchiingee'e eloken;

dada ifixxa duuchchi'aanna o'waaken.

10 Ee, Duuchchi Woddike Goottaa!

Dada atixxi duuchchi atee saaddaan;

atik ardinna atee kubisaan.

11 Insa'ne, atixxe moottummaka gaachchanna odeesinaan;

atixxe hunnaxxanna haassonnaan.

12 Konne qicinni ardi duuchchi

atixxa mambe'iinxa hujuwwanna

atixxe mootummake, gaachchannika lumminne ege'naan.

13 Atixxi mootumma duuchchii woddixxe mootumman;

galcha atixxinna ila ilateeten;

14 Duuchchi Woddik Gootti ibaakaaranna kiphaan;

ibeekaaranna ke'issaan.

15 Duuchchiinxi ille heqecati atiba'a uddaan;

atinna ita insa'ne'a yannate'n uuttatton.

16 Ati anga atixxa farri assittatton;

dada duuchchixxa halchanna goddissatton.

17 Duuchchi Woddiki Gootti ora ifike duuchcha'n qullichchaken;

assaaxxe duudhcha'ninna arjaken.

18 Duuchchi Woddik Gootti ye'edhaake duuchchi'a,

dhugaati isoo'o ye'edhaake duuchchi'a isi shiqiken.

19 Isi isoo sodaataakixxa halchcha duuchcha wonshaan;

raare insa'nexxa laqeexxi insa'nee anjiraan.

20 Duuchchi Woddik Gootti isoo sodaataakaara heqaan;

fuggaalleeyye duuchcha kinni balleessaan.

21 Afo'i ank Duuchchi Woddike Goottixxa saadino haaso'aan;

dada duuchchinna isika woyyichcha summa

duuchchii woddi'a saaddowwaal.