Faarsaleeyyetike Akeekisanji'a Suusu'let Faarsendaaxxa Qorexxe Hortexxa Faaro.

1 Ee, Dada Duuchcha Ajajjatoke Duuchchi Woddike Goottaa!

Ati hexxa'etexxi bakka hittatta eeyyisa'neexxe?

2 Lubbo anxi Duuchchi Woddike Goottixxa baxxe yo'oshsha yortaan;

hedhaake Mageni'a mitte godobinni gammada'nee illillisannon.

3 Anke moyanjoo, anke Magenoo, Ee, Dada Duuchcha Ajajatoke Duuchchi Woddike Goottaa!

Atik tolchiinke boonchiba,

diilisse midde ifinga mine,

bejjo'otinna beltanna uggudhdhitaaxxa ifinxee bakka afe'een.

4 Atike mini giddo hedheeke mannixxa wodo!

Insa'ne atee duuchchi wodda saandaan.

5 Ati insa'ne'a uudduudake kadee'naa

Tsiyonxe Koobaba'a me'atee godobik yora'neeke mannixxa wodo!

6 Insa'ne'e oodhishshatixxe bagoxxe dhooqa giddii'n sa'naa wodda

Mageni insa'ne'a eettene bakka muume phu'issaaxxe assaan;

mayetik xeeninna isee lashshi assaan.

7 Insa'nenna me'inaa wodda uduuda lephphina'n me'inaan;

mitti mitting Tsiyooni hedheeke Mageni edo afemmaan.

8 Ee dada duuchcha ajajjatoke Duuchchi Woddike Goottaa! Soodachcho anxa laqi;

Ee Ya'iqoobike Magenoo! Mansha atixxa aniba'a wirri assi.

9 Ee Magenoo! Golla no'okee uudi;

hariirtetekanna eloxxenni uudi.

10 Weleba kuma barra hedhat mannii'ni

atixxe baxxe'ni mitte barra hossa woyya;

Fugaaleeyyetike duunkaani giddo hedhati mannii'n

anke Magenike minixxe hula edika uurricho melledhanno.

11 Duuchchi Woddik Gootti Mageni arshotenna wontete kademaxxee

Duuchchi Woddik Gootti gaachchannakanna ulfaachcho uwwaan;

Isi balleessa bello me'aaka manna eloxxa yaane hanqisabaan.

12 Ee, Dada Duuchcha Ajajjatok Duuchchi Woddike Goottaa!

Atee addateeke manjixxa wodo!