1 Ee, Duuchchi Woddike Goottaa! Ati anee qorqortee egendette.

2 Ati ofo'la ke'aa anxa egendatton;

bayyii'ninni anke godobika yaada hubbattattoon.

3 Me'anna hafuura adhdha anxa qorqortatton;

assannoxxa duuchcha egendatton.

4 Ee, Duuchchi Woddike Goottaa! Haaso'ebe'no edi darre

maa haaso'onaa'a hedaannexxe egendatton.

5 Ati edi udumii'n

anga atixxanna ani hana gaaddissette.

6 Tennee ege'na ani'a mambe'aken;

dande'e dhaqqanbabe'noxxe xungon.

7 Atike Hafuurnaa'n haba marannoo?

Ati edii'n dande'e baajannoo?

8 Iimmi'a me'oonnole ati ookkonni hexxeten;

reyemmaki manni hedhemmaba giddo sa'e diiphonolenna ati ookkonni hexxetten.

9 Arishsho fuldammabaa'n phirri hiyye me'oonnoole

yookaan arishsho aagammaba bayya hedhonnoole,

10 Ookkonna kaddoole anee anga atixxi akeekaan;

middixxi atixxi anganna anee kiphphaan.

11 Ani, «Dukkana dhugaagaten, anee shoxxaan,

qarqara anke hedheek ifi hashshate kaddaan» hiyyennele,

12 Dukkana ati'aa dukkandabaan;

hashshatinna barrishsha iffaan;

tennexxee ati'aa dukkanatinna ifi mittengen.

13 Ati anxa giddixxa manjumma dada'eetten;

anxe amake godobi giddo

loobbe'e anee daddetek ateten.

14 Ani maso mambe'ake kadee'e dademeennaxxee'e

ateee saadda'eennen;

huje atixxi mambe'aken;

tenneenna ani adda ege'neennen.

15 Ani sho'ik dademenne wodda

dhi'moo godobi giddo dademenne wodda

micci anki duuchchinna ati edo sho'eemabaan.

16 Ille atixxi, anxee amake godoba'ni munde ititebaa wodda anee affeen;

ani'a murendeexxi barruwwa

atike maxaafa'n borreeseende'een.

17 Ee, Mageno ati ani'aa affe'eetik yaadi yo'oshsha ulfaatekenna ba'lake kadeemmaxxee'e

ani ege'naa dande'abe'non.

18 Yaada atika laakko'anno hiyyeennele maanchii caala bira sa'eeken;

dammaqanno woddanna atinni welti hedhennen.

19 Ee, Mageno fuggaaleeyye shilteetelena'a!

Ha'noo munde dundinaak manni ane'naa'n bayyatte.

20 Insa'ne atixxa fuggoxxa hassona;

naaphi atikinna summa atika fuggoxxenni ganaan.

21 Ee, Duuchchi Woddike Goottaa atee jibbaaka ani isoo jibbabe'nnotaa?

Ate'ni ke'aakaaraa ani insa'nee diqatabe'nootaa?

22 Ani insa'nee mitti godobinninni jibbeennen;

anke naapha kande'een.

23 Ee, Mageno qorqotte anee uudde'e godobixxa anxa afi;

anee hega uudde'e yaaddo anxanna ege'ni.

24 Ani giddo fuggoxxi hexxeexxe kaddoole uudi;

duuchchi woddike ora'ninna anee akeek.