1 Ee, Duuchchi Woddike Goottaa! Anee heqqittotta'a atiba'a dageennaxxee haranga anee shookishshoxxe'e!

2 Qullumma atixxeenna anee gatise fulchi;

oodhishsha anxa laqqe'e anee anjiri.

3 Ati ani itti baajannoxxe,

duuchchi wodda itti gollatannoxxe anxe rassa kadi;

ati anxe rassanna jabake golla kaddeettaxxee anee anjirtotta'a ajaja sa'issiteetten.

4 Ee, anke Magenoo, fuggaaleeyyetixxe anganaa'ninna

mararte afebaake xaqartichiixxe anganaa'n anee fulchi.

5 Ee, Lummoke Duuchchi Woddike Goottaa! Adde anxi ateten;

oosummatenaa'n telchi qico'n addette assedhdhaanekinna atenden.

6 Anxe amake godobanaa'n ilemannoshsha assitteetek ateten;

ilemennexxenni telchi qico'n ate'n irkateennen;

aninna atee duuchchi wodda saadannon.

7 Ani heddi mani'a fakkeennake kadeennen;

Ati ani'a jabake golla kade'eeten.

8 Afo'i anki barra duuchcha atee ulfeesatinna saadat wo'meeken.

9 Cimoti giddo anee deetoxxe'e; hunna gophanno wodda anee waaldoxxe'e.

10 Anki naaphi fuggoxxe ani'a mari'ate'een;

anee shiyo'a hasammaakiir mitteba gudde.

11 Insa'ne, «Mageni isoo wale'een; isoo anjiraak hedhebaan ke'we hordonfe isoo abindo» hinaan.

12 Ee, Magenoo! Anenaa'n bayyattoxxe'e;

Ee, anke Magenoo rakke'e aneee gargaar.

13 Anee gareeraak manni salphate ba'owwaal;

anee miidho'a hasaakiir tuffateme'e shookowwaal.

14 Ani kinni duuchchi wodda atee adde anxe assedhannon;

galatange'ni hana galata shiqishati atee saadannon.

15 Laakko'enna bira gophonnole midde,

atixxe qullumaxxeenna atixxe anjirummaxxee barra barra'ninni haaso'annon.

16 Ee, Dada Duuchchike Goottaa!

Dagennexxi assitetexxa jabaxxa yaannuwwa,

atixxa qullumma calla lallabannon.

17 Ee, Magenoo! Ati oosummandenaa'n anee barachchiise'eeten;

ta'i qico'n atixxa mambe'iinxa huje haaso'annon.

18 Ee, Magenoo! Dande'a atixxanna dagaaxxe ila'n,

hunna atixxanna ila duuchcha'n haaso'anno qico'ni cime arre fulchonnolenna midde anee waaldoxxe'e.

19 Ee, Magenoo! Qullumma atixxi lummexxe'e iima gelte'eexxen; lumollamma yaanuwwa assite'eeten;

Mageno atishsha hedheek ayyinna hedhebaan.

20 Heddo rakkonna abara uudannoshsha assittotolenna haaroba;

hedho qammalchite'e dhimo balenaa'n anee fulchittatton.

21 Higgeggeen anee ulfeessitteten;

lebbenna anee dayyeessittaton.

22 Ee, Magenoo! Xuurameessumma atixxee baganik atee saadannon;

Ee, Isira'eelike woyyichcha ani masinqot faarsa'n atee saada'eennen.

23 Atee faarsanno wodaa afo'i ankinna

ati woddetexxi anxi lubbo ati'a illillissaan.

24 Anee miidho'a yoraak shooke salphateemmaxxee afo'i ank barra duuchcha qullumma atixa haaso'aan.