1 Ee, Magenoo! Atee galateeffanta'eennen; summi atik shiqike kadeemmaxxee ati'a galata unaannen;

ardi assittetexxa yaanenna oodeesaan.

2 Mageni hiyya'ne qici, «Ani murte murannoxxa barra woxxe'eennen;

eettene yanna toggi assee murannon.

3 Buttanna ise giddo hexxeexxi hedho affeexxi daduwwa culphisoolenna midde;

buttatika utupha abidee jabeessannoki anten;

4 Ani hollaameeyye ‹Ifi saadinoqqe'e›

fuggaaleeyyetanna ‹Hollati gaafa fulchitinoqqe'e!

5 Holati gaafa iimi'a togginoqqe'e;

yookaani hollati gooba qeerrisine'e haasotinnoqqe'e hiyyannon› » hittatton.

6 Ulfaataa borotenaa'n yookaan dhidhimakenaa'n,

yookaani qiilla gammoojenaa'n daggabaan.

7 Mageno callanni murte muraak;

wele ulfeeseexxi wele salphisaan.

8 Duuchchi Woddik Gootti ifixxe anga'ni wo'ma fule bageeki woyinetik bulbul hedhexxa mufetixxa buuda afe'eemman;

ise giddii'n mufeti bulbulo dunaa wodda fuggaaleeyye duuchchi ha'witaan;

cingotinna gattebaang cingilsitaan. 9 Ani kinni duuchchi woddi'a lallabannon;

Ya'iqoobika Mageno faaroti saadatanna waalabe'no.

10 Isi kinni hantaaleyyetixxa hunna enqaan;

qulliyyetixxi hunna kinni lebenda'nee me'itaan.