1 Maasa hiyyemaake bogik manji Yaaqek belti Agure salalik haaso'eek hiyyichchi konnechchinn butti'a hedheen;

kunni manji Iti'eeli'a, Iti'eelinna Ukaal'a haaso'e.

2 «Ani manjo duuchchanaa'n jaalaten, manji hedammaxxa hedino afebe'non.

3 Beekkuma baratebe'non, woyyichchiinxe ege'nennengechchi hedhebaan.

4 Iimi'a fuleeki, dirreek isinni ayyete?

Diidallo gunse abixxe'ek isinn ayyete?

Wode'uwwa ifixxe seemmann usudhdheek ayyete?

Bogiinxa gabala duuchcha jabeesse uurriseek ayyete?

Summi ising ayyte? Beltiinki summi ayyete hinaake?

Egendottole amo mee ane'ni kul!

5 «Mageniink hiyyichchi duuchchi mitte gugurto afebaan;

Isi iso'o adde assedhaake duuchchi'a wonteten.

6 Isike hiyyichcho'n ittanna lebboxxe;

hexxebaaxxa lebbottole xixaan, ate'e dharichchake assaan.

7 «Ee Duuchchi Woddike Gootta lame yaane ate'e soodataannen;

reyebe'nog ane'e hoyyexxabexxoshsha soodataannen.

8 Haranga dhugaa dharake asse haaso'atena'n ane'e heqqi;

hiyyummatenna kadi durumma ani'a uutoxxen;

yaanee kinn telcho ite hosannoxxa ita ani'a uwwi.

9 Iita kada gophphoole ite godde atena'ni finqile,

‹Duuchchi Woddik Gootti ayyete?› Hiyyannoxxe hexxeen;

Yookaan hiyyoome moorannon;

anke Magenika summanna yowwisanon.

10 «Erganjo atika gootti isiki edo elobaaxxinn hamattoxxe,

dedha ate'ni fuggoka afo'o fulchee'na miidhendatton.

11 «Anna ifinga yowwitaaxxi,

amatanna lumissabaaxxi ila hexxeen.

12 Ifi qullichcha assexxe uuddaaxxi,

kaddo male'e batto'e ca'a hiyyebaakir hedheen.

13 Holle kijibeekirinna manjo tuffataak mannuwwa hedheen.

14 Rakkichcha bogakenaa'n

hiyyeessakanna manjiinxe oddonaa'n shorre balleessate'e

Isso wolantichchinsha,

qeqqeshshikinna kaara hinake habillishsha hexxeexxi horte hexxeen.

15 «Alqiitti lame meyyaxxa oose affeen;

‹no'o'a uwwe! No'o'a uwwe!› hina'ni hongaan.

«Ijjenda geyeen goddeennen hitabaaxxi sase yaanuwwa hexxeen:

‹Hara ane'e geye'en!› hitabaaxxi shoole yaannuwwan:

16 Kunniichchuwwinna, herreessa,

ildebaaxxi manjichcho,

wode'e gophe baqaqeek buttin, ‹hunnati iima hexxeexxe› geyyen hitabaaxxe giirateran.

17 «Anna ifika cee'maakinna amatika ajaja tuffate qeeqaak,

Dhooqa giddo hedheek haanquwwi ille isixxa qote aadhaan;

allaatuwwatinna ittaan.

18 «Hara mambe'a assissaaxxi sase yaane hexxen:

qaabbatabo'noxxi shooleten.

19 Sinbiri iima me'aan,

bofi harkisema'n butta me'aan,

Hobolo abbayate'n me'itan,

meyyaxinni jaalalat qiliphphisaake labbakeran.

20 «Addatendabaaxxi are; yabaabuldaaxxi aro'i edo qullichcha manjo fakkaateexxi,

‹Mitte ballessengechchi hedhebaan› Hitaan.

21 «Butta sase yaanenni raankitaan,

wele dhiisin dandeette ba'exxabaxxi shoole yaanuwwan:

22 Garbichchi moya sane,

da'labi ite goddoole,

23 Jibbendeexxi manjo aro'o alfita sane,

meyyaxxi garbitte hujisammaxxa moote dhaalda wodda kaddaaxxe yaanuwwan.

24 «Buttate'n shoole shiixara

jabaxxa ege'na affeexxi yaanuwwa hexxeen;

25 Xuxuwwa hunna affebaxxe daduwwan;

kaddo malee indaachcho boni gaafa yannande'n ca'mitaan.

26 Osoletinna hunna afebaachchoran;

kaddo malee kinotixxe oddo'n holla galduma asse'ne giise'naan.

27 Awwaanesuwwi moyanjo anfeebaan;

kaddo malee gume googessik me'aan.

28 Dadda'le angati abindaangechchon;

kaddo malee moyanjiinke mooteti mine'n e'itaan.

29 «Me'injonge'n mambe'a hiyyendeexxi sase yaanuwwa hexxeen.

Matanga gaachchanna affe'e hirikki hiteexxi shooleten.

30 Biniichchi giddii'n jabak

feedheechchonaa'ni ittanna mishikk hiyyabaak neenqaken;

31 Re'eti kormi, baroodaki lukoti korman;

insa'neke ardi edo ulfinki leelak moyanjuwwan.

32 «Oossoommate'e ifi lummissottole

yookaan elobaaxxa yaane heddottole

ifi heeshshi assite uudi.

33 Ado raansaa wodda buuri dagammashsha,

sano gannaa wodda mundaattammashsha

mufe duuchchiinsoole lolake ke'aan.»