1 Lame afo'ike manji mannii'n, unshinaachcho afebaaka hiyyeessa woyyan.

2 Ege'na belo assendaaxxi yaane la'o affeba'a,

wiinama birasa'anna dedhake'n ibissa.

3 Manji gowwumma ifixxenni ba'ne ifi'n idaqqeexxi,

Duuchchi Woddike Gootta'n aaraan.

4 Karra heddo jaaluwwa ilda, hiyyeessa kinni ising fir isonaa'n bayyata.

5 Dharik dhugaa kulaak xixemebaak gataba'a,

dhara haaso'aakinna xixenshatenaa'n fulaba'a.

6 Heddi manji galchallokenaa'n elle alfo'a hassaan,

uwwa uwwaake manjinni welti duuchching jaaloke.

7 Hiyyeessa manjo godobing dayyuwwi isoo'o jibbaan,

jaaluwwi iskifa'i caala isonaa'n bayyata;

fedhee qiconna safata'n insa'ne hordofoolenna midde insa'ne alfabaan.

8 Muxxumma eeyyaak hedho ifixxa eeyyaa,

qalbeeffachchotanna jabaate halsaake isi'a qajeeldaan.

9 Dharik dhugaa kulaak xixemebaak gataba'a,

dhara haaso'aake'ninna ba'ne daga.

10 Oossoommataak xoo'mamik hedha hasissabaan,

garbi ja'laabiinke galchallo kadoole fa'i hittata fuggoxxe!

11 Muxxumma manjo ossalloke assitaan,

balleessa tuffate waaliyyotinna isi'a ulfaataten.

12 Moyanjiinxi mufata neenqinxe harqashsha sodaachchissa,

isonaa'n elle alfanna badda'a haanjisammaxxe kiifoshaten.

13 Hawwawwi belti annake'n ba'ne idaga,

dha'a hitaaxxi arenna aro'okee uurrabelo cophphi cophphi hiyya'n xissammake xissishshaten.

14 Minikinna karra hadokee'n dhaalaachcho,

qalbeeffachcho afeexxa are kinni uwwaak Duuchchi Woddike Goottan.

15 Booso'umma cokokki assite diipho idagga,

hujabaak manjinna solo'wa.

16 Ajaja heqqedhaak hedho ifixxe heqqedha,

Mageninka hiyyichcho tuffataak kinni ba'a.

17 Hiyyeeyyetee uwwaak Duuchchi Woddike Gootti'a liqeessaan,

Duuchchi Woddik Goottinna asseexxe huje'a hira isi'a uwwa.

18 Higaaxxi yanna hexxee'na belto atika oossuummande'n xixi, reyo'anna sammi hite waaldoxxe'e.

19 Hifatichchi manji xixema hasissa,

mittele waalde saxxotole wele woddanna walde sa'a atixxi gattaba'a.

20 Gorsa laqi, akeettetanna adhdhi,

udumi uduma muxxete kaddatton.

21 Manjiinxe sammo'n heddo yaada hedheen, muuxemaaki kinni Duuchchi Woddike Goottike yaadon.

22 Manji halchaachchi jabaxxe jaalalan.

Dharichchake kadiyyoti mannii'ni hiyyeessa kada woyya.

23 Duuchchi Woddika Gootta sodaata hedhotiba'a geessissa,

sodaataaki manjinna ti'ni hiyye ofo'laan,

rakkotinna iso'o geltaba'a.

24 Boose'i manji qore giddo uggeexxa anga,

qore giddii'n adhdha midde iso'n a'urtaan.

25 Gacifataaka gandotole,

oossoomataak qalbeeffachcho barataan,

qalbeffataaka xixi, ege'natanna alfaan.

26 Anna mulqedhaak, amatanna shoraak,

shookokanna salphine idagaake belton.

27 Anke belto gorsa caqasa waaldottole,

egendeettexxa barachchonna midde deetatton.

28 Dharik dhugaa'a kulak seerake'n gacifata,

fuggaalleessi manninna balleesa itatishsha xe'mifataan.

29 Gacifataakeri'a murte,

oossoomataake'e kutti qixxeesseme'e.