1 Duuchchi Woddiki Gootti moortaaxxa kiilo giba,

dhugaatixxe kilo'ni kinni gammada.

2 Hollatixxa duuka salphinake dagaan,

shaqqake manjonaa'ni kinni beekumake afemaan.

3 Qajeeli mannixxi balleessa afagopha insa'ne akeekka,

addatemabaaki manni kinni sobi ifingennin ba'aan.

4 Duruumma murtetenaa'ni gatisaba'a,

qullumma kinni reyotenaa'ni gatissa.

5 Qajeeli mannixxi qullumma insa'ne'a ora qajeelchita,

fuggaalleeyye kinni ifinxe fuggoxxe hujenni baxxa.

6 Qajeela manna qulumma insa'neexxi insa'nee anjirta,

addatemabaaka manna kinni fuggoxxi insa'neexi gaabe insa'ne fonxorta.

7 Fuggaalleessi manji reyaa wodda addatemaaxxi yaane tolanga gattaan,

ifi'ni hollammaaxxi yaane duuchchi isinninni welti baxxa.

8 Qullichchi manji rakkotenaa'ni anjirema,

fuggaalleessa manjo'n rakko caala gelta.

9 Fuggaalleesi manji afo'ik manjo balleessaan,

qulliyye kinni affeexxe ege'nanni miliqqa.

10 Qulliyyetee yaane qajeeldaa wodda qachchi gammada,

fuggaalleeyye rertaa wodda kinni ililisate kadda.

11 Qajeeli manni eebbisemaa wodda qachchi nophpha,

fuggaalleessi mannike afo'inni kinni qachchi ba'a.

12 Qalbeeffachchotixxa xe'ya afeeki manji manjo tuffata,

qalbeeffachcho afeeki kinni afo'o buqedha.

13 Hamataaki manji maqo haaso'a heqqe abidaba'a,

addatemeeki manji kinni maqoti haaso'a fulchaba'a.

14 Akkeettetixxi xe'ya hexxeeba ardi ibaan,

gorsa uwwaaki heddi manni hedheeba kinni injiffachcho kokessenda.

15 Ege'nebaake manjike liqi'aa annooma adhdhaa manjo'n rakkote geltaan,

annooma adhdha gibaaka kinni rakko iso'n geltaba'a.

16 Arija manjichcho ulfinna alfita,

hunnaameessi manni kinni karra calla alfa.

17 Elo manjiinxi elle isi'aanni la'o uuta,

fuggichchi manji kinni umo isinge'n rakko iyyedagga.

18 Fuggichchi manji hujaaxxe huje'a alfaaxxi dhugaati la'o hexxeba'a,

qullumma hujaak kinni dhugaatike hira alfa.

19 Dhugaat qullummate'n galaak hedho alfa,

fuggoxxe'ni me'aki kinni reyo'a me'a.

20 Duuchchi Woddiki Gootti dabaaleessa yaadika manna diqata,

ci'memaachcho afebaake'n kinni gammada.

21 Fuggaalleessi manji xixemebaak gatabaaxxa ege'ni,

qulliyye kinni tennenaa'n gatta.

22 Qalbeeffachcho affebaaxxe dancha manjoxxi danchumma,

booyyetixxe sano'ni uggendeexxe worqexxe danchummashshaten.

23 Qulliyyetixxe halchaki muuxami haanonna eloke,

fuggaalleessi mannixxe addeki muuxami kinni ba'nete.

24 Mitti manji arjoome uwwake kaddole saxxeexxa karra alfa,

mitti manji yo'oshsha donnoomoole, kinni hiyyoomaan.

25 Ariji durrooma,

wele manna dheebo fulchaak isinna dheebo fula.

26 Sho'ik midha mine tuu'leeka ardi yowwaan,

dikko fulche'e gurguraaki kinni eebbisema.

27 Eloxxa yaane jabaate harsaaka manjo eloxxe iso'o heqitaan,

fuggoxxa yaane harsaaki manji kinni fuggonxe iso'n geltaan.

28 Karra ifixxe'n addataak duuchchi iba,

qulliyye kinni kichchotishsha quffa.

29 Mini hado ifika olokaaki manji mittelchcho alfaachchi hedheba'a,

gowwi manjinna muxxe manjike garba kada.

30 Qulliyyetixxi gumma hedhotike haqichchon,

manna gorse hiisaak isi muxxeten.

31 Qulliyye hujjeexxe hujeka hira buttande'n alfitammashanni,

iittanni fuggaalleeyyetinna cubbaalleeyye buttate'n ifixxe hujeka hira alfitaan.✝