1 Moyanjo Limu'eeli'i ama barsiiseexxi barachcho konnechchinni butti'a hexxeexxen.

2 «Anke belto i'lennekee, wereegik alfennekee,

3 Hunna atixxa melaallete'n birtoxxe'e,

tenne yaanexxi yaane moyanjuwwakanna midde salphisse'een.

4 «Koo Limu'eeli moyanjuwwi woyinetixxa booka ha'wiyyo

galchalluwwikinna machchoossitaaxxa ha'wa halchiyyo hasissabaa,

tinni moyanjoke kadeeki manji assaaxxe yaanebaan.

5 Moyanjuwwi ha'we machcho'oole seera dedheexxi,

miicemeeke mannixxa deette hoyyedhaan.

6 Ba'aake manni'a machchoossitaaxxa ha'wa

wixxirri hiyya'neekiri'anna ha'wino'a woyinetixxa bookka uwwe.

7 Insa'ne hiyyumma ifixxanna

rakko ifixxa deenaashsha ha'winowwaal.

8 «Ifixxe yaane'a haaso'a dande'aabaake manni'a ati insa'ne'a haaso'i,

miicemeeke mannixxe deette'a ati uurrite haaso'i.

9 Insa'nexxee haaso'i, dhugaatixxa murtenna muri;

hiyyeeyyetixxanna rakkiyyetika seera heqqisi.»

10 Eloke adabixxa are ayyete ise dande'e alfa?

Iseki hiri fiixeeke kinjuwwi caala lumoo qico fiixxeexxe.

11 Aro'i iseki ise'e mitte godobinni amanaani,

hasissaaxxa yaane duuchcha isena'ni gophabaan.

12 Ise hedhoti hexxeeke baro duuchcha'n isi'a eloxxe assita malee'e

fuggoxxa yaane iso'ni assitabaan.

13 Fuutinxanna liyonotixxa seemma

eettene huje eetaaxxe anganni

gammadda'n hodhdhatixxe huje'n siitaan.

14 Dadaltotixxe lumoxxe hoboloshsha,

bayya marta'n gargar gargar hexxeexxa ita gurte iyyedagaan.

15 Adda soodebang kexxa,

ifike minihadi'a ita ra'issita;

dubarte erganjuwwa ifixxeenna hujetika qoobbo uutaan.

16 Umo ifingenninni isenni heddeexxi boga hirta,

alfitaake maalaqininna woyine kaassaan.

17 Jabaatteexxi huje ifixxa huccita,

uduudi isekinna hujetee'e jabaken.

18 Hujja'neexxi huje duuchcha la'o idaga'neexxa qalbeeffataan,

hashshanna hujjaammaxxe'e xassi iseki xo'abaan.

19 Giissiteeka fuutta liqaqake'n suqqeexxi

seemmatanna ganda.

20 Hiyyeeyyetanna rakkiyye gargaartaan.

21 Isek mini hadi duuchchi eebbitaaxxa seemma afeemmaxxee'e

kaade gandoolenna midde sodaatabaan.

22 Taqete'n fayendaaxxa seemma giissitaan,

dhiille bifaxxa hujendeexxa eloxxa seemma oddo'witaan.

23 Aro'i isek bogiinxe geedhe giddo,

qachchinxe hula edo afolaaba ulfaateeke.

24 Fuutinxa seemmanna sabbata ganda'n,

daddaltuwwate'n gurgudhdhitaan.

25 Ise jabbaxxenna ulfaatte'exxe,

hegerinna gammadda'n hexxaan.

26 Haasotta wodda beekkumik haasottaan,

haaso'i iseki giddonna eloke gorsa hedheen.

27 Duuchchi wodda hujete'ni siite'e mini hado iseka uuddammaxxee'e,

haranga gonphe ise'ni leellitabaan.

28 Oose isexxi kexxee isee saaddaan,

Aro'i isekinna isee jaja'ni,

29 «Eloxxa assiteexxi heddo melaalle hexxeen,

ati kinni duuchchinxenaa'n saxxatton» hiyya.

30 Danchumma la'o affebaan, dhaggatinna ba'aachchon,

Duuchchi Woddika Gootta sodaattaxxi manjichcho kinni jajendaan.

31 Hujjeexxe huje duuchchi'a ise'a gicce,

assiteexxi isexxi elola yaanerinna isee manni giddo ulfeessituun.