1 Eloki hiisichchi aare qiidisaani;

fuggoki hiyyichchi kinni mufe bira sa'issaani.

2 Muxxe manjiki arrabi ege'na saadaani;

oossoommataake manjiki arrabi kinni gowwummate haaso'aani.

3 Duuchchi Woddike Goottixxi ille duuchchiini booncho uuddaaxxeni;

fuggaalleeyyenna qulliyye uudaani.

4 Eloki arrabi hedhotike haqichchoni

dabaalleesi arraabi kinni lubbo yaadisaani.

5 Oossoommataaki manji anna ifikika gorsa tuffataani;

gorsa adhdhaaki kinni qalbaameessake kadeexxa ege'nishshaani.

6 Qulliyyetiki mini karra callinni wo'meekeni;

fuggaalleeyye alfitaaxxi la'o kinni rakko insa'ne'nini geessissaani.

7 Muxxe manniki arraabi ege'na bira sa'issaani;

oossoommataake mannixxi qalbe kinni iittatebaani.

8 Duuchchi Woddiki Gootti fuggaalleeyyetika tolcha diqataan;

qajeeli mannixxe soodachcho'ni kinni gammadaani.

9 Duuchchi Woddiki Gootti fuggaalleeyyetika me'injo diqataan

qullummate'ni me'akara kinni eeyyaani.

10 Dhugaatika ora waalaaki manji jabaaxxa mura waxaan;

xixichcho gibaaki reyaani.

11 Reyemmaki manni hedhemmaxxi bakkanna ba'neetiki boonchi Duuchchi Woddike Gootti edo farri hiyye leelaan;

manniinxe qalibe giddo hexxeexxa fa'i hittatta ege'ne'e!

12 Gacifataaki manji xixxichhco gibaani;

muxxeeka mannanna mari'achchiisabaani.

13 Manji giddo gammashsho afoole albi ifaani;

isi giddo yaaddo hexxoole kinni hedho isixxa kurbu assitaani.

14 Qalbaameesi manji ege'na harsaani;

oossoomaataak manji kinni gowwumma alalchaani.

15 Miicemeeke manniki bari duuchchi rakkotikeni;

gammadaaki manji kinni duuchchii wodda fenxe hiyyaani.

16 Lumoxxa karra horachchoti wixxirri hiyyati mannii'ni;

Duuchchi Woddika Gootta sodaatati welti hexxeexxa heenoxxa karra woyya.

17 Weli jibba hexxeeba ha'yotika jibichcha dulle ita mannii'ni,

weli eeyya hexxeeba shaana ita woyya.

18 Aarameesi manji lola ke'issaani;

ossi manji kinni lola qiidisaani.

19 Boose'i manjiki ori utetike dalla'ishshateni;

qajeeli manniki ori kinni gugurto afeekebaani.

20 Muxxee belti anna ifika gammachchiisaani;

oossoommataaki manji kinni ama ifinxa tuffataani.

21 Qalbeeffatabaake manji'a gowwumma gammachchiisaani;

qalbaameesi manji kinni dhugaatike ora'ni me'aani.

22 Mari'e hedha gophphoole hendeexxi yaane bakka geltabaani

mari'achchiisaaki manni hedheeba yaane qajeldaani.

23 Manji hasissaaxxa hiissa hiissoole gammadaani!

Yannate'ni uwwemaaki hiyyichchi yo'oshsha eloken!

24 Reyemmake manniba'a me'atenaa'ni anjiremaashsha;

hedhotiki ori muxxe manjo akeekaani.

25 Duuchchi Woddiki Gootti hollaameessi manjika mine diigaani;

aro'o shi'witeexxe manjichchoxxa gabala dhiinbabaashsha heqqaani.

26 Duuchchi Woddiki Gootti fuggoke manjika yaada jibbaani;

qulliyyetiki yaadi kinni gammachchiisaani.

27 Donni manji ifike mini hado'ni rakko iyyedagaani;

matta adhdha gibaaki manji qeerraaka baro hedhaani.

28 Qullichchi manji heda'ni haaso'aani;

fuggaalleessi manjiki afo'i fuggoxxe fulchaani.

29 Duuchchi Woddiki Gootti fuggaalleeyyetenaa'ni bayyataani;

Qulliyyetixxa soodachcho kinni laqaani.

30 Ifi manjo gammachchiisaani;

Eloki haaso'i miccoke'ni aagaani.

31 Hedhotiba'a geessisaaka xixichcho adhdhaaki manji;

muxxee mannixxe oddo'ni hedhaani.

32 Cabbema tuffataaki ifinni tuffataani;

xixichcho adhdhaaki kinni beekake kadaani.

33 Duuchchi Woddika Gootta sodaata muxxumma barachchoteni;

ulfinna alfate'e shaqqake kada hasisaani.