1 Woyinetixxi booka manjo gacifataake, jabaxxi ha'wanna manjo lolinke assita;

konneechchinni ifi dedheeki duuchchi muxxallokebaan.

2 Moyanjiinxi mufe neenqiinxe ittanashshaten,

iso'o mufachchiisak manji reya.

3 Lolakenaa'n baaja manjoke'e ulfinnake,

yaadik oossoommateek duuchchi kinni lolake'e muddama.

4 Da'labi manji yannate'n huccaba'a,

tennexxee aassatike agenjo'ni midha halsa;

mittelchonna alfabaan.

5 Manjiinxe qalbeki hedumi dhi'mo giddo hedheeke wodi'ishshate,

kaddo malee'e qalbeeffataaki manji kinni ookko'ni ikki'laan.

6 Heddi manji wele eeyya'neeshsha ifi asse'e haaso'a,

dhugaati addatemaaka manjo kinni ayyete alfa dande'a?

7 Qullichchi ci'mendabaaxxe hedho hedhaa,

isi uduma iso'o hordoffaaxxi isixxi oose eebbisendeexxe.

8 Moyanji murte uwwo'a mootete'ni ofo'laa wodda,

fuggoxxa yaane duuchcha uude gargar asse ege'naa.

9 Isinni, «Qalbe anxa ca'unteti heqqedheennen,

ani ca'ichaken; cubbo afeebe'non» hiyyaakis ayyete?

10 Lame weli qixxe kaddeebaaxxa mikenna moortaaxxa kiilo,

tenne lamiinxa Duuchchi Woddik Gootti diqata.

11 Anno midde adaba ca'itetenna qajeeltote kaddeexxa aasitaaxxe yaanenaa'ninni ege'nendaan.

12 Mansha laqqo'a ille uudo'a,

lamiinxa Duuchchi Woddike Gootta dade'eeni.

13 Diipho eettoxxe'e hiyyoondatton,

kexxe hujjottole kinni gelte gatteexxa ita alftatto.

14 Miya hidhdhaak,

«Kunni kadaakebaan» hiyya'n hira buti'a abida,

higaa wodda kinni hire qico ifi'a saada.

15 Worqetinna hexxe,

fiixeek kinjuwwinna wo'meechcho,

ege'nat haaso'aaki afo'i kinni worqe yookaan fiixeeke kinjuwwi caala fiixake.

16 Alagi manjike liqi'aa annooma adhdheeke manjiixa seemma adhdhi,

ookkone alagi manjichchixxa eettene seemma abixxi.

17 Manjo sonbe'e indaaxxi yaane xe'mita,

udu'mitaaxxi kinni afo'i giddo kinjo kadda.

18 Gorsa laqeexxe'e affeteke yaadi'a hujeti ora fulchi,

lolakeena fuldaattole akkeette adhdhi.

19 Hamataak manji maqo haaso'a gadho fulcha,

tennexxe'e afoollichcha manjonaa'n bayyati.

20 Anna yookaan ama ifixxa yowwaak belti,

lubbo isixxi dimma dukkana'ni ba'ammake ifishsha baxxaan.

21 Elobelo alfendaaxxi karra, muuxami iseki ebbisemabaan.

22 «Ane'ni gelteexxe balleessa'a halo fulebe'noki!» hitoxxe'e,

Duuchchi Woddika Gootta heqqedhi;

isi ate'e gargaaraan.

23 Lame weliqixxe kaddebaaxxa mikenna moortaaxxa kiilo Duuchchi Woddik Gootti diqataan.

24 Manjiinxe hedho'ni kaddaaxxa duuchcha Duuchchi Woddik Gootti mura,

hittatta manji ifixxe hedho'ni kaddaaxxa ege'na?

25 Uduma unsha hinaboxxoshsha Duuchchi Woddike Gootti'a werreega werreegebexxong edi darre xexxe'achchoti hedi,

26 Muxxalli moyaji ayyiir fuggo hujemmaxxa gargar assee ege'na, mitte mararte belo insa'ne'e xixa.

27 Manjiinxi sammo Duuchchi Woddike Goottike xassa,

isenna godobika manjiinka yaadanna qotte affaan.

28 Jaalalatinna addatensha moyanjo galchita,

jaalalati moote isixxinna ti'ni hite hexxaan.

29 Dargageeyyetee'e gaachchanni uduuda ifiken,

geedhetiki ulfinni kinni arre insa'nexxe.

30 Miittaaxxi siqqo manji giddii'ni fuggoxxa fulchitaan, ganetinna manjiinxa giddixxa hedho ca'a assitaan.