1 Anke beltoo! Liqa dande'e hiissa gopheeke manji'a,

hiissisatee annooma adhdhitootole,

2 Haasottetteki haaso'inna,

atee fonxortishsha abidoole,

3 Anke beltoo! Ookkone manjixxe anga'n ibbette hiyyoten;

tennexxe isixxe anganaa'n fuldattoshsha rakke isiba martettexxi,

ookkone liqa hiissisatika annooma ateenaa'n hoyyaashsha iso'o kadhat.

4 Tennee assitebexxoki diiphi atee adhdhoqqe'e,

suukkinna hitoxxe'e.

5 Buddanne adamammake manjixxe anganaa'n,

ci'atinna fonxorotenaa'n fulchexxemmashsha ifi anjiri.

6 Ati boose'i manji mari xuxetiba;

galduma isekanna uudde muxxete kadi.

7 Xuxe ajajaaka affebaan,

yookaan akeekakkanna kadi galchaaka affebaan.

8 Kaddo malee ittaachcho bono qixxeeffatta,

la'ataachchonna midhatixxe aaggoxxe yanna'n bukki asseexxa.

9 Koo ati boose'i! Duuchchii wodda diiphpha'n hexxatto?

Diiphokenaa'n kexxatokita haanote?

10 «Shixxo qico diiphphaanneni, shiixoo qico suukki hiyyaannen,

anga mirqedhe shiixxoxxa yanna hufuura adhdho» hitaa'naa,

11 Ate'n hiyyo naaphiinsha duwwi gatatinna,

loliinka miya ka'leeke manjishsha ate'n daggaan.✝

12 Baasho'eekinna fuggoki,

kukkutanji erqe kayya dooyaak,

13 Isinna manjo sobatee,

illet qipha'n anga lekkati haaso'aaki,

14 Godoba afeexxe xaqaronni fuggoxxa hedaak,

haanonna isi weli gonphete ilaan.

15 Tennexxe'e ba'ne iso'n ikki woddi daggaan;

dedhange'ni ba'aan; gatabaan.

16 Duuchchi Woddiki Gootti jibbaaxxi jaane yanuwwa hexxeen,

diqataaxirinna torbaanete kaddaa wodda tinninna konneechinni butti'a hexxeexxen:

17 hollitaaxxa ille,

dhara haaso'aaka arrabo,

balleessa afebaaka manjo shiltaaxxa anga,

18 fuggoxxa giddo uggudhaaka godoba,

fuggoxxiba'a gongatee wiinandaaxxa lekkuwwa,

19 dhara dharake'n lebba'n dhugaa kuldaaxxa dhuga,

dayyuwwiinxe oddo'n weli gonphe ilaaka manjon.

20 Anke beltoo! Atike annika ajaja heqqedhi,

ama atixxi barachchiisaaxxa barachchonna giboxxe'e.

21 Tenneeranna duuchchii woddi'a godoba galchedhi;

goobake'ninna didhdhi.

22 Tinniir me'itatto wodda atee akeekkaan;

diiphphatto woddanna heqqitaan;

dammaqqatto woddanna atee yaansissaan.

23 Kunni ajajuwwi xassiinsha ati'a ifa xassaan,

tinni barsiisanna ati'a ifake,

Cabbemati toggi hiyya,

ati'a hedhotike oran.

24 Tinni barsiisuwwa atee'e elobaake addabixxe,

buuro afo'ixxe yabaabulto manjonaa'n ate'e gatissaan.

25 Danchumma isexxa atee'e godobi yoroqqe'e,

yookaan isexxe illexxe qe'lenchonni atee'e boojittoqqe'e.

26 Mitti labbak ifi gurgudhitammaxxi manjichcho mitte yannaxxee itake hirrinni alfa dande'aan;

wele manjixxe arenni welti yabaabulaak kinni lubbo ifixxa gophaan.

27 Seema isixxi gubattebaang,

boba giddo giira uggudhdha dande'aaki manji hedheesi?

28 Lekka isixxi gubatebaang,

kashilo hadha'ni me'aki manji hedheesi?

29 Annafeexxe arenni diiphphaaki manjinna iittanden;

Isenni irkateekinna iso'n geyiyyo hassissaake xixichchonaa'ni gatabaan.

30 Solo'weexxi moore abidemeeka manjo,

ayyinna iso'o tuffataba'a.

31 Mine afeechcho duuchcha gurgursissaaxxe kaddolenna,

abidemeechchinni torbaane anga asseexxi moreechcho hiissowwaal.

32 Yabaabulaaki manji kinni qalbeeffachchotixxe xe'ya afeeken;

ikki iitta assaak duuchchir lubbo ifixxa tola balleessaan.

33 Ganenshatinna salphinni isike qoobbon,

shookikinna isonaa'n hara gatabaan.

34 Hinaaffe aro'ii

aareti bubbi hiyyaashsha assitammaxxee'e,

isi halo fulaaxxa yanna mararte ege'nebaan.

35 Isi heenee muranna itabaan;

hara bira saxxeexxi uwwanna isixxa mufe qiiddisabaan.