1 Moyanjik welt qore mitte'n ittotta'a shiqqatto wodda,

ayyinni ittaattexxa qaabbati.

2 Solo'witottole midde:

haafenda'ni ittabexxoshsha ifi heqqedhi.

3 Dedha ate'e hega uudaaxxe hexxeeni

shiqqaaxxa eloxxa ita haafende ittoxxe'e.

4 Duroomatate'e ifi kurbu assitabexoshsha

muxxummati ifi heqqedhi.

5 Durumate'ni ifi uwweexxottole;

keela fulche'e iimate'ni me'ammake sinbirishsha,

uuddaa'nanni haba copheexxa gophphatton.

6 Donni manjixxa ita ittoxxe'e;

xe'maxxi ita majajjoqqe'e:

7 Ita tanna godobi mittinite kaddebaang

lame godobinni hedheexxi sobe akkisa'ni,

«Iti, ha'wi» hiyyaan.

8 Itteettaxxa shiixxoxxa ita midde honqootatton,

geeqqishaani haasottettaxxi hiyyanna tola boddichcha gattaan.

9 Gowwik haasottoxxe,

haaso'a atika qe'yiin xure geessisabaan.

10 Gabalate'n hedheeka hundaayyet beessisa mee kisi;

anna affebaaxxe ooseka boganna ku'lite adhitoxxe.

11 Anjiralli insa'nek jabaken,

isi atininn welt murte insa'ne'a uwwaan.

12 Hedino atixxa borachchotiba'a,

manshatanna ege'na uwwake hiyyichchiba'a hiissedhi.

13 Belto xixichcho waaldoxxe;

kutik gandeetexxe'e reyabaan.

14 Matanga kutik abidde kulchiissottole;

lubbo isixxa reyotenaa'n woddete hiyyoten.

15 Koo anke belto, beekkuma horattottole,

qalbe anixxinna yo'oshsha gammadaan.

16 Suume atixxi toggichcha haaso'a hoosotolenna,

giddixxi hedho anxi duuchcha gammadik nigaa muddeen.

17 Qalbe atixxi fuggoxxa hujaaka manna yortoqqe,

yaane kinn duuchchi wodda Duuchchi Woddika Gootta sodaati.

18 Tenne assitottole hegerik galdumi atiki qajeeldeeke kaddaan,

halcha atixxinna tola gattabaan.

19 Koo anke belto caqas; beekuma horat,

qalbe atixxinna qajeela oranaa'ni ittanna mishikki hitoqqe.

20 Woyinetixxa booka fakkanshe ha'waakerinninna itatee'e

haafemaake manninni welti guddittoxxe.

21 Machcho'aluwwinna harbaqeessi hiyyoomaan;

bira sa'aaki mugi bibbixendeexxa seemma oddeessaan.

22 Ate'e i'leeka anna caqas,

ama atixxi cindoole cee'mitoxxe.

23 Dhugaa, beekkuma, xixichchokanna ege'na,

maallaqa ifike assexxe abixxi.

24 Qajeel beltik anni yo'oshsha gammadaan;

beeka belto i'leekinna kijibaan.

25 Anni atikinna ama atixxi gammanduun;

ate'e ildeexxi amanna ililissowwaal.

26 Koo anke belto godoba atika ani'a uwwi;

ille atixxinna ora ankenaa'n mishikk hitoqqe.

27 Afoollitte are cu'maxxe baleshshaten,

yabaabulto manjichchonna dhi'mo caffa'an.

28 Moodhalshetishsha gaaddaan,

mulqammakara manjiinxe oddo'ni fakkanshitaan.

29 Hunbaashsha yaado ayyixxeete?

Lolinna weli hiisensha ayyixxeette?

Tola boddichcha mado'a ayyixxeete? Ille diimisa ayyi'aate?

30 Tinni duuchcha gelta'nek woyinetixxa booka ha'watinna futti hineenga jabaka ha'wo ha'watinna yanna huje belo sa'issammake mannanaa'niten.

31 Birillete'n diimatte

cala cala hiyya'ni,

xe'ma'ne godobi'a sa'aani, woyinetixxe bookaba'a uudde sobendoxxe.

32 Uduma dhudhdhuufiinsha iddaan;

buutetishshanna hafuurakanna woraan.

33 Ille atixxi haaroxa yaane mee uuddowwaal;

toggi hite haaso'aakanna heda dandeettabexxon.

34 Atinna abbaayyate'n diiphpheetteshshanna;

hobolotike oddotike utuphpha'n irkattettelchcho labbaan.

35 Atinna «Anee'e ganneen, yaane kinn miidhemebo'non,

uxxineen ane'n maachchonna labbebaan;

Eega haanota dammaqaanne?» hitatton.