1 Muxxeeki belti anniinka gorsa qalibeefate laqaan,

gacifataak kinni xixichcho laqabaan.

2 Elok manji elooke haaso'a ifike'n elooxxa yaane alfaan,

addatemabaaki manni kinni hunnati manjoke'n ke'a halcha.

3 Haaso'a heqqedha'n haaso'aak hedho ifixxa heqqedha,

afeeshshanni haaso'aak kinni ba'aan.

4 Boose'i manji jaba qico halcha mittelchonna alfaba'a,

jabaate huccaaki kinni halseechcho godda.

5 Qullichchi manji dhara giba,

fuggaalleessi manji kinni shookokanna salphinne iyyedaga.

6 Qullumma qajeela manjo heqqita,

fuggaalleessumma kinni cubbaalleessa balleesita.

7 Mittelchonna afeechchi hedhebaang ifi durreesaake assaaki manji hedhe,

weli kinni ifi hiyyeessake assaaki hedhe, yaane kinni isi lumoxxe karra afe.

8 Karra horateeki manji isenni ifixxa hedho woda dande'a,

hiyyeessi kinni tenne rakko afeba'a.

9 Qulliyye ifiinsha wa'a hittee iffa,

fugaalleeyye kinni xo'ammake ifishsha xoxxa.

10 Holla lola calla bira sa'issita,

muxxumma kinni gorsa adhaake manna'n afendaan.

11 Elobelo afendaaxxi karra butti butti'a higa'n me'ite muddaan,

maallaqa ifika heeno heenoka qulsaakee kinni isi'a camemaan.

12 Turteexxi addachchiisa manjo yaadissa,

halchatixxi wo'miyyo kinni hedho uwwaake haqichchon.

13 Gorsemeeka gorsa tuffataaki umo ifike'n ba'ne iyyedaqqa,

ajaja ulfeessaaki kinni hira alfa.

14 Muxxe manji barachchiisaaxxi barachcho hedhotixxe muummen,

manjokanna reyotixxe fonxoro'n abidemabaashsha gatisa.

15 Qalbeeffachcho alfa manjo ulfataashsha assita,

addatemabaake mannik me'inji kinni ba'nete'n geessisaan.

16 Qalibameessi manji huje muxxummati hucca,

oossoommataak kinni gowwumma ifixxishsha hucca.

17 Fuggoki erganji rakkote'ni iba,

addatemeek erganji kinni nage'a afisaan.

18 Cabbema gibaaki hiyyoomenna shookoke'n iba,

toggi assemaak duuchchi kinni ulfaataan.

19 Halcha muuxxendaa wodda hedho gammaddaan,

oosommataakir kinni fuggoxxenaa'ni bayyata eeyyabaan.

20 Muxxe manjinni hosaak muxxete kada,

oossoommataake manninni jaalomaak kinni rakkot miidhema.

21 Fuggooxxi cubbaalleeyye hordoffaan,

qulliyyetiki hir kinni durummate.

22 Qajeeli karra ifixxa oosetixxe oose'a sa'isa,

cubbaalleeyye tuu'liteexxa karra kinni qulliyye dhaalda.

23 Hiyyeyyetike fichchixxi midha missaaxxe hexxe,

yaane kinni seeribeloke mannanaa'ni kexxexxa ise'e gophenda.

24 Kutik belto ifika gana sodaataak belto ifika gibaaken,

belto ifika eyyaaki kinni xexe'achchoti xixaan.

25 Qullichchi itee godda;

fugaalleeyye kinni solo'witeeshshanni hexxaan.