1 Anke beltoo! Anka hiyyichcho adhdhitottole,

anka ajajanna godoba atike'n galchexxottole,

2 Mansha atixxi beekuma caqqassaashsha assexxottole,

qalbe atixxanna qalbeeffachchotibaa wirri assexxottole,

3 Iittanni ege'natee kadhattottole

haafuurakanna gikki assite qalbeefachcho ye'exxottole,

4 Iseenna birretike sibljishsha halsittottole,

moogemeeke maallaqishshanna isee jaba qicinni yortottole,

5 Ookkonee wodda Duuchchi Woddike Goottixxa soda'a qalbeeffattatton;

Mageno ege'natanna alfitatton.

6 Muxxumma uwwaaki Duuchchi Woddike Gootta callan;

ege'natinna qalbeeffachcho afendaak isike hiyyichchonaa'niten.

7 Isi qajeeli manni'a injifachcho tuulaan;

ci'mensha belo me'aakeri'aanna isi wonteten.

8 Isi dhugaa assaakeerika ora heqqaan;

ifixxe xuurameeyyeka me'injonna gollaan.

9 Ookkone wodda qullumma, dhugaa assa, yaane toggi assa,

eloxxe yaaneka ora duuchchanna qalbeeffattatton.

10 Muxxumma ate'ni qubatteemmxxee'e,

ege'natinna atee gammachchissaan.

11 Elo yo'ooxxa gargar foya atee heqqitaan,

qalbeffachchotinna atee gollitaan.

12 Beekkumi haaso'i insa'neek dabaaleessake kadeekeerinaa'n,

fuggaalleeyyetike oranaa'ninna atee anjiraan.

13 Iitta hedheeki manni dukkana giddo me'atee,

ookkonee toggichcha ora waalaakeeran.

14 Elobaaxxa hujate'n gammadaakiirinna,

dabaaleessi fuggoke ora'n me'a wodda illillisaakiir,

15 Ori insa'neek midda middichcha,

ifika me'injooranna daddassaakeeran.

16 Muxxumma yabaabulto manjichchonaa'n atee heqqitaan;

fonxore abidaake iseke shaqake haaso'anaa'ninna anjirtaan.

17 Isenna siretika ifika aro'o waldeexxe,

Mageni edonna aaggemmaxxa kako deeteexxen.

18 Iseke minibaa marta'attole me'itaattebi reyotibaten;

isebaa mara reyemmak manni hedhemmaba maratixxe qixxen.

19 Isebaa e'yaak ayyinna ille iima higabaan;

hedhotika oranna alfabaan.

20 Tennexxee atinna eloke mannika ora me'i;

qulliyyetika me'injonna hordofatton.

21 Qajeeli manni ookkone boga'n hedhammaxxee'e,

ci'mensha beloki manninna ookko hedhaan.

22 Fuggaalleyye kinni ookkone boganaa'n fuggusendaan,

xuurameessumma xe'iteemmakiirinna ookkoo'n goshemaan.