1 Anke beltoo! Atee barachchiisennexxa barachcho deetoxxe'e;

ajajuwwa anka godoba atike'n galchedhi,

2 Barachcho anxi heddo barruwwa ati'a lebbaan,

hedhotixxa wogguwwanna ati'a qeerrissaan; nage'akanna ati'a uutaan.

3 Jaalalatinna xuurameessumma atenaa'n mee gophendowwaal;

tenneera gooba atike'n didhdhi,

atixxe qalbe giddonna borreessedhi.

4 Ookkone wodda ati elletanna eloka summa,

Magenokenaa'ninna manjokenaa'n alfittatton.✝

5 Mitte godobinni Duuchchi Woddika Gootta addati,

ifixxe ege'na'ninna mee irkati.

6 Assitattoxxe duuchchinni isoo ege'ni,

isinna ati'a ora atika toggi assaan.

7 Ifike yaadinni ani muxxeten mee hiyyi;

Duuchchi Woddika Gootta sodaat, fuggoxxenaa'ninna bayyat.✝

8 Tinni, biso atikee fayya,

micco mikita atikeenna jabeenna uutaan.

9 Duuchchi Woddika Gootta karra atixxe duuchchanni,

atik bogi fulcheexxe gumma duuchchika umo isi'a uwwati ulfeesi.

10 Tennee assitottole atik gootar wo'mee danbala'aan;

atike waaba'ninna woyinetixxe booka xuphphi hittee wo'mitaan.

11 Anke beltoo! Duuchchi Woddike Goottixxa cabba tuffattoxxe'e,

atee xixaa woddanna dingi dingi hittoxxe'e,

12 Anni eeyyaaka belto cabbammashshanni,

Duuchchi Woddiki Goottinna eeyyaakaaranna cabbaan.✝

13 Muxxumma alfaakeerixxa

qalbeeffachchotanna ifixxe assedhaakeerixxa wodo.

14 Tennexxee beekkumi birreti siblji caala hira afe'eeni;

worqeti caalanna la'o afe'eeni.

15 Muxxumma hiri fiixeexxe kino caala fiixxeexxen;

ati halchitaattexxe yaanuwwa duuchchanaa'ninna isenni qixxo'aachchi hedhebaan.

16 Middixxe isexxe anga'n qeerrake baro hedhe;

bita'ixxe isexxe anga'ninna durummanna ulfinna afe'een.

17 Ori isek eeyyisaaken;

qaxxaamuri isek duuchchinna nage'aken.

18 Isee hanqalfaakeeri'a ise hedhoti haqichchon;

isee'e dhaphphi asse abixxaakiirinna eebbisemaan.

19 Duuchchi Woddik Gootti muxxummati butta dade;

qalbeeffachchoti iimuwwa isenxe bakka bakka'ni offo'lishe;

20 Isixxe ege'nanni buttinii hundixxe baarxi dhi'mo dhoote,

duumanchuwwikinna buttatee xeena gansiisse.

21 Anke beltoo! Seeriinxi murtenna qalbeefachchoti elo yo'oxxa gargar foya atenaa'n baxxoqqe'e;

tinniir atixxe sammo giddii'n meenni me'ittowwaal;

22 Tinniir ati'a hedhotanna,

goobiinke seesa kaddaan.

23 Ookkoneechchi uduma ora atika nage'ik me'itatton;

atixxa lekkanna guffo gandabaan.

24 Diiphphatto woddanna ruphphi hitabexxon;

hashsha duuchcha nage'iinke diipho diiphphatton.

25 Dedhange'n kaddaaxxe bararassitaaxxe yaane'a,

fuggaalleeyyete'n daggaaxxe bala'aanna alaltabexxo.

26 Duuchchi Woddiki Gootti una atixxe kadeexxi miidhaachchonaa'n atee heqqaan.

27 Assaa dandeettattoxxa yaane,

rakkateekeeri'a eloxxa assa mee gibi.

28 Ta'a anganni affeenni heexxe'e atika ollalcho,

«Soodo ati'a uwwannon;

higge dagi» mee hiyyi.

29 Addeti ati bira hedha'neeke atike ollalcho'n,

fuggoxxa iso'n heddoxxe'e.

30 Mitteelchchinninna atee balleessebaaka,

manjo tolanga mee ku'li.

31 Fuggichcha manjo hinaaffoxxe'e;

isika hoonee oranna mee hordofi.

32 Duuchchi Woddiki Gootti fuggoka manjo diqataan;

qajeela manjo'n kinni godobixxe kula.

33 Duuchchi Woddike Goottixxi badino fuggaalleeyyetike mine'n hexxe,

qulliyyetiki mini kinni eebbisemaan.

34 Duuchchi Woddiki Gootti weleke'n gacifataakeera'n gacifata;

ifi heeshshi assaakeeri'a kinni gaachchanna uwwa.✝

35 Muxxe manni ulfinna alfaan;

gowwoole kinni isfi salphisaan.