1 Cabbema eeyyaaki manji ege'na eeya,

toggi assema gibaaki kinni gowwake.

2 Eloki manji Duuchchi Woddike Goottanaa'ni elle alfa,

manjo dedhisaake manjo'ni kinni Duuchchi Woddiki Gootti mura.

3 Fuggoxxi huje fuggichcha nage'a hoyyita,

qulliyye kinni lele'mitaba'a.

4 Qalbameette manjo aro'o ifike'e kallachchaken,

aro'o ifika shookishaaxxi are kinni micci giddo lullugaake luuxishshate.

5 Qulliyyetiki yaadi toggichchake,

fuggaalleeyyetiki gorsi kinni dabaaleessake.

6 Fuggaalleeyyetik haaso'i shiltammaxxe fonxoroshshate,

qajeeli manniki kinni manna anjira.

7 Fuggaalleessi manni reye muda,

hafe insa'nexxinna gattabaan,

qulliyyetixxi horte kinni lele'mitabaan.

8 Manji muxxumma ifixxe'n galateeffatema,

fuggoka yaada afeeki manni kinni tuffatemaan.

9 Itaachcho afebaangi ifi saadaake manji mannii'n,

ifi lummisebaangi hucce galaaka manjo woyyan.

10 Qullichchi manji ifika hore mararaan,

fuggaalleeyye kinni duuchchii wodda marartaba'a.

11 Fichcha huccaake manji'a itaachchi wo'meke,

la'o affebaaxxe yaane'a gongaaki manji kinni xe'ya heduma afeeke.

12 Fuggaalleeyye saamendeexxa karra weli gaabbitaan,

qulliyye kinni eloke hiddichchishsha eloxxa ra'istaan.

13 Fugaalleessi manji haaso'a ifingininni fonxoremaan,

qullichchi manji kinni rakkotenaa'ni fulaan.

14 Manji eloke haaso'i ifikenni eloxxe yaanenni wo'maan,

huje isixxishshanna hasisaaka hira alfaan.

15 Yaadiki oossoommataake manji'a me'inji ifiki toggichchake labaan,

muxxe manji kinni gorsa laqaan.

16 Yaadiki oossoommataake manjixxi aare ikki woddi ege'nendaan,

qalbaameesi manji kinni yowwichcho tufatee waalaan.

17 Dhugaa haso'aaki manji uudeexxa dhugaa kulaan,

dharichchi manji kinni dhariki dhugaa kulaan.

18 Afeeshshanni haaso'aake manjiki haaso'i bagedinsha ota,

muxxe manjiki afo'i kinni fayyisaan.

19 Dhugaa haaso'aki afo'i kinni duuchchii woddi'a hedha,

dhara haaso'aaki arrabi kinni ikki woddi ba'aan.

20 Fuggoxxa hedaake mannixxe qalbe giddo fuggoxxe hexxeen,

nage'i dagaashsha gorsaake manni'a kinni gammashsho hexxeen.

21 Qulliyye fuggooxxi geltabaan,

fuggaaleeyyete'ni rakko bira saxxaan.

22 Duuchchi Woddiki Gootti dhara haaso'aaka afo'o eeyyabaan,

dhugaatike manna'ni kinni gammadaan.

23 Qalibaameessi manji ege'na sho'edha,

gowwoole kinni haakito ifika haaso'ik leellishsha.

24 Huje jabaatee hucce manjo galchalloke assitaa wodda,

boosse'ake kada kinni garbake assita.

25 Ruphphi hiyya manjoke'ni yaado bira sa'issita,

eloki hiyyichchi kinni gammachchiisa.

26 Qullichchi manji jaalo ifike'e elooke gorsa gorsa,

fuggaalleeyyetik me'inj kinni dedhake'n ibisaan.

27 Boose'i manji adame iyyedageeka maala midde dudhilshabaan,

baredi manji kinni ifixxa karra lummisee uudaan.

28 Qulummatike ora'ni hedhdho hexxeen,

ookkone ora'n reyo hexxeba'a.