1 Kaade bono xeen kinni midha aassatixxa yanna hasissammabaashshanni,

gowwake'e ulfinni hasisaba'a.

2 Ci'a keelik kexxe me'itaa wodda ate'n mitte rakkonna idagammabaashsha,

toliinxi badino ate abidaba'a.

3 Fadhadokee'e halange, gangete'e bixaal hasisammashsha,

gowwiinke bisi'anna siqqo hasissa.

4 Atinna isishsha gowwaake kaddaboxxoshsha,

gowwake'e gowwumma isixxishsha hissitoxxe'e.

5 Yaane kinni «Ani muxxete» hiyye ifi uudabaashsha,

gowwake'e isixxe gowwumma leellishaaka hiissichcho uwwi.

6 Gowwi dhaa'me ergedha,

ifixxa lekka kutatishsha yookaan fuggo ifi'ni idaqammashshate.

7 Gowwii mammaakaaki mammaassi naaffe rarrateexxe lekkashshate.

8 Gowwa ulfeessa, looyyate'n gudunfemeeka kinjo looyyatishshate.

9 Gowwi manji mammaakaaki mammaassi,

machcho'eeke manjinxe anga'ni hexxeexxe uteshshate.

10 Gowwa yookaan afeenga ora sa'aaka manjo huje hujilsaak manji,

gabe afeshanni darbata'n manjo madeessakeni.

11 Honqo'eexxa honqo'o worshi wirri hiyye'e itammashsha,

gowwi gowwummati hiyyemanxe hiyya.

12 Muxxete kadebaang muxxe'eeshsha ifi assaaka manjo uudette?

Isi mannii'n gowwa woyya.

13 Boose'i manji, «Orake'n neenqake hedhe,

sodaachchisaak neenquwwi orake'n hedhe» hiyya.

14 Saanqi maaxafi hana wirwir hiyyammashsha,

booso'i manji taqeti hana gangalata.

15 Boose'e manji ito'a qore giddo anga ugga,

yaane kinni ita afo'o uggudhdha iso'n a'urtaan.

16 Boose'i manji qalbeeffachchoti hiissichcho hiissaake torbaane manna caala,

ifi muxxete assa.

17 Wele mannike lola'ni oddo e'yaaki manji,

Ora sa'ammake worshixxa mansha abidatishshate.

18 Manjo shiyaaka qaraka mogiddo yookaan bagedo maraattichchi darbaammashsha,

19 «Roorotte'n» hiyya'n manjo sobaaki manji iitta isishsha hedheekeni.

20 Haqqetixxe gophemmanni giira xoxxa,

odichchiinxe gophemanninna loli gataani.

21 Cilaatte kashilo, haqqetinna giira, ha'yinshammashsha

gegge'aki manji lola ke'issa.

22 Hamataake manjik haaso'i xe'maxxe itashsha,

godob giddi'a luqu'mi hyye e'ya.

23 Godobake'ni fuggoxxa uggudhdhe afo'ik eloka haaso'a haaso'aak manji,

baqeeka birretika sibiljo hana buyyineeke faarinke mi'a.

24 Xaqartichchi manji afo'ik eloxxa haaso'a'n foggoxxa godobi giddo hedaan.

25 Isi godobi giddo fuggoxxa wonshedhemmaxxe'e,

xe'make haaso'inni ate'e maxxisoolenna meenn haaso'a isika dhugaate assedhi.

26 Xaqartichchi fuggoka ifika yaada godobi giddo sho'edhoolenna,

isi assaaxxe fuggoxxe yaaneni manjo duuchcha'n leella.

27 Weleke'e bale qotaak ifi'aanni giddo e'ya,

kinjo goggo'mishaakanna ookkone kinjonde illee iima hige iso'n goggo'ma.

28 Dharichchi manji ifi'aanni miidhema miidhemanga manna jibba,

lame afo'ikinna ba'ne idaga.