1 Fuggaalleeyye manna gaabbitoxxe'e;

insa'nenn jaaloomate'e gudditoxxe,

2 Godobi insa'nek xaqarote heda'nen;

shokko haaso'aan.

3 Mine beekkumik ijaaraan;

ege'nat le'ma belo jabaate hedhaan.

4 Beekkumiki he'noole mini elollanna

fiixa miyuwwinni wo'maan.

5 Beeki manji jabaxxa hunna afeen;

ege'na afeek manji jabeenna itti lephpha'ni me'aan.

6 Lola ibate'e gorsa eloka

injifachchotenna heddi gorsalluwwi hasisaan.

7 Ege'na afebaak manji beekkuma horata dande'abaan;

qachchiinxe hulaxxe baxxe'n haaso'e dande'abaan.

8 Shokkot yaane qotaak,

«Xaqartichcha» hine ye'naan.

9 Gowwi duuchchi wodda cubbo hujate eeyyan;

roorraka manjo manni jibbaan.

10 Rakko ate'n gelta wodda hooda yo'oxxa affoottole;

jabeenn atik goofake hiyyoten.

11 Reyotiba me'aakara gatisi;

shiyate'e weli abixxe ma'amakara hiiss.

12 Atinna, «Tenne yaane ege'neennengechchi hedhebaan» hitottole,

godobixxa file findige ege'naak isi qaabbatabaa?;

Lubbo atixxa heqqa'nek isi haake'e?

Isi mitte mittenge'e huje isixxishshanni hira uwwabaa?

13 Koo anke belto malebi eloochchon iti;

la'etinna yo'oshsha xe'me calliichon.

14 Beekumikinna lubbote'e iittanni xe'ma'neechcho kadeexxa ege'ni:

beekkuma affoottole soodik atik galduminna qajeelaan; hegerii atixinna tola gattaban.

15 Qullichchi manjike mine'n bokkaametishsha qoone abixxite gaaxxitoxxe;

galduma isikanna keekkattebaaba buqqoxxe.

16 Qullichchi torbaanele midde iboolenna ke'aan;

fuggaalleeyye kinn fuggo insa'nexxinninn inbaan.

17 Naaphi atik ibaa wodda mee godobi atik gammadoqqe;

guggufataa woddanna ililissoxxe.

18 Kada gophphoole kinn Duuchchi Woddik Gootti tenne uude gammadabaan;

naapha atike'n idagammaxxa mufe waalaan.

19 Fuggaalleeyeye mannixxe huje'a rakkattoxxe,

elobaaxxa assa'neera'n gaabbitoxxe.

20 Gifeeffataak heger'a adde assedhaaxxi yaane hexxebaan;

fuggaalleeyyetik xassi xo'e liphphi hiyyaan.

21 Koo anke belto Duuchchi Woddika Goottanna moyanjo sodaat;

xaqaro assaake manninni ittanna gudditoxxe'e.

22 Duuchchi Woddiki Gootiinna moyanji tenne fuggaalleeyye'ni jabaxxe bala ibisaan:

insa'ne'ni geltaaxxi bala hittaxxeexxe kaddeexxa ege'naak ayyete?

23 Kunniir kinn beekoletik mammaassan;

murte weleke'e gamisa elobaaxen.

24 Balleesanjonga, «Ati qullichchaken» hiyyaaka,

gosa gosak ardi iso'o yowwaan; mannikinna gibaan.

25 Yaane kinn balleesanjo toggitte murtenni murtaaxxe hayyoole'a elonxi insa'ne'a kaddaan;

lumoxxa karranna horantaan.

26 Dhugaatixxa murte muraak,

lubboti jaalishsha uudemaan.

27 Sirete'n galduma atike'e fichchi giddo kaddaaxxa yaane duuchcha giissedhi;

ookkonechchi uduma mine ijaadhdhi.

28 Fedhee manjo'n buuto mitte belo baassitoxxe;

dedhisaaka haaso'anna iso'n fulchexxoxxe.

29 «Fuggoxxa huje hujeenxe qixxe'n aninna elobaaxxa iso'n geessisannon;

halo anixanna hiissedhannon» hitoxxe.

30 Boose'i manjike fichchi giddii'n qaxxaamurenne;

wodanaa afebaake manjik woyinetike hiddichchi bogika kute sa'enne.

31 Ookkone booncho'ninna utenna badda'a quffeemman;

kinjiink dalla'inna diigemeen.

32 Uudennaxxa yaanenna memmekisennen;

hede qonxise baranno alfenne.

33 Shiixxo qico mugi, shiixxoon qico suukki hiyyi;

lekka qaxxaamursite heenoo qico hafuura adhdhi.

34 Yaane kinni hiyyo saamammake manjiinsha;

hiyyo lolinka miya ka'leeke manjishsha ate'n daggaan.