Marcos 11

Yessuussi Lumoke Ulfinninni Iyyerussaalemi’a E’ye

1 Insa’nenna Iyyerusaalemi’a shinqee wodda Debrezeyitixxe kooba bira hexxeexxe Beetefaagenna Biitaaniya gennee wodda Yessuusi ifixxe hordofeeyye giddi’ni lame hiyye ergee qici: 2 «Ha’no edi darre hedheeke ola’ibaa me’e! Ookko’o geltineeshshanni hirbange’ni huuni manji ofo’lebaaka harretika beltanjo usuremee’naa affinaani: isoo tikkineexxi idagge! 3 Huuni manjinna: ‹Maassitino’aate?› ha’no hiyyoole: ‹Goottakee hasissaammaxxeeteni; isinna hirbange’ni isoo wirri asse hiissaan!› hiyyee hitine kulle» 4 Insa’nenna me’ineexxi mine mitteke hula’ni orake’ni harretik beltanji usuremee’naa anfeexxi tinke. 5 Ookkoo uurreemmake manni giddii’ni mitti mitti insa’nee: «Beltanjo mayeete tikkina’neek?» hine. 6 Hordofeeyye isixxinna Yessuusi insa’ne’n hiyyeemmaxxa mannake’n kulde: mannikinna eeti insa’ne’a uwwe. 7 Hordofeeyetinna ookkone harretika beltanjo Yessuusibaa iyyedangeexxi seemma ifi ifixxa haratike beltanjiinke dudduro’n hana uggine: Yessuussinna iso’ni hana ofo’le. 8 Heddi manni ifi ifixxa seemma orake’ni fayeemmaani: welkinna haqichchinka shafa enqa’ni fayyaamman. 9 Isi edii’ninna me’aammakirinna isi udumii’ni hordofaammakiir hafuura gikki assine: «Hoosa’inna! Goottiinke summinni dagaaki eebbisemeekeni! 10 Gootiinke summinni dagga’neexxi anni no’okixxi Daawwitixxi moottumma eebbisendeexxeni! Hoosa’inna ale iima!» raarra’emman.

11 Yessuusi Iyyerusaalemi geye; Woyyichchi Galmi giddi’aa e’ye: isinna loolake’ni hexxeexxa yaane duuchcha uude: bogi hashsheemmaxxee tommenna lame hordofeeyye isixxenni welti Biitaaniya’a me’e.