1 aḏ yuwa lliy diyma yella y muwsa:

«teqqim rziyeṯ ijeṯ, tawetteγ siyes ferƹuwn aḏ imiṣriyen. beƹdis tafenniseyyeb s yeh. we afenizeƹzeq lkulkum. 2 mmel ṭuruh y israliyen; tiseḏnan aḏ irgazen ayeḍleb kul yjen sisen s ljaris wureγ aḏ lfejreṯ.» 3 aḏ lliy diyma yella yerra imiṣriyen rlan af midden. aḏ muwsa yeḏwel d argaz d ṣbiḥ aḏ d meqqar al imiṣriyen aḏ al midden lliy nnaḍḍen s ferƹuwn.

4 yaxy yberreḥ muwsa zzaṯ ferƹuwn yuwa.

«ayuh mag yemmal lliy diyma yella: < taƹeddiγ yid zgen yeḍ g amas n miṣr. 5 tanγeγ ibedriyen lkul g tammurt n miṣr seg bedri n ferƹuwn lliy af lƹerc al ubedri n tetciwt lliy tezzaḍ af tessirt aḏ ijjaren imezweren n zwayel. 6 we ayeli ṣeyyeḥ d meqqar g miṣr lkul wizrinc am netta qebbel aḏ wizrinc am netta beƹd.

7 amma jar israyiliyen winebbeḥ ḥetta d yeddi af lƹebd naγ af zeyleṯ aḏ lweqt ḏḏin asnem lliy neči weziγ israyiliyen seg imiṣriyen. > » 8 aḏ yuwa muwsa y ferƹuwn: «lweqt ḏḏin, aldesen middeniḵ lkul inuh we aṭebsen zzaṯiw we amlen: < ureḥ cek aḏ indin lliy debƹen diyeḵ seg midden. > lweqt ḏḏin areḥeγ.» iγeccec muwsa yeƹdel, yeffeγ s ferƹuwn. 9 yuwa lliy diyma yella y muwsa: «rahiy ferƹuwn wiyeqqil ayeṣeγd dwiywem bac arnineṯ lmuƹjizaṯiw g tammurt n miṣr.» 10 aḏ ggen muwsa aḏ haruwn layaṯ lkul zzaṯ ferƹuwn lekenti lliy diyma yella yseqṣeḥ ixfis aḏ wiseyyebc aṯ israyil seg tzaγwin n miṣr.