1 aḏ yeggi beṣleyil ttebuwt seg isγaren n ssenṭ, ṭṭulis sen leḏruƹ aḏ wezgen aḏ lƹerḍis am lƹulwis dereƹ aḏ wezgen. 2 iγelfy s jjaj aḏ barra s wureγ ṣbiḥ aḏ yeggas lḥacit n wureγ. 3 aḏ 4 n tḥelqeṯin yeggineṯ af treknis kul senneṯ g ljeheṯ, 4 aḏ sen igeḍman seg isγaren n ssenṭ iγelfin s wureγ ṣbiḥ. 5 aḏ yseḏfin g tḥelqeṯin n lejnab n ttebuwt bac atqamen sisen. 6 aḏ yeggi beṣleyil ddan seg wureγ ṣbiḥ ṭṭulis sen leḏruƹ aḏ wezgen aḏ lƹerḍis dereƹ aḏ wezgen. 7 aḏ yenḥet g ddan sen iqeruwbin, kul yjen sisen af ṭṭerf n ddan. 8 kul lqeruwb af yjen n ṭṭerf mmuneḥten siyes aḏ bbedden af leḍrafis. 9 aḏ wsiyn metqeblin, aḏ lejneḥeṯesen sreḏḏen al nnaj bac aggen ṭṭel af ddan lliy uḏmewnesen smuqulnas.

10 aḏ yeggi ṭṭewleṯ seg isγaren n ssenṭ ṭṭulis sen leḏruƹ aḏ lƹerḍis dereƹ aḏ lƹulwis dereƹ aḏ wezgen. 11 iγelfiṯ s wureγ ṣbiḥ aḏ yeggas lḥacit teƹla seg wureγ. 12 aḏ yeggas lḥacit iḍen am lgafun lƹulwis 4 n idudan aḏ lḥacitis d wureγ zada. 13 aḏ yenγellas 4 n tḥelqeṯin, yeggineṯ af idernis 4 adug lḥacit. 14 aḏ nihintin d imuḵan n igeḍman lliy taqamen ṭṭewleṯ sisen. 15 aḏ yeggi igeḍman seg isγaren n ssenṭ lliy γelfen s wureγ y uqami n ṭṭewleṯ. 16 aḏ seg wureγ ṣbiḥ yeggi tiḥeḏweq n ṭṭewleṯ aḏ tbesis aḏ lkisanis aḏ ibriqnis lliy taneγlen sisen matta taḏucen.

17 aḏ yeggi nnir seg wureγ ṣbiḥ. aḏ yenḥet teqeƹetis aḏ daris aḏ lkisanis aḏ isγernis aḏ nnuweris seg ṭṭerf yjen. 18 diyes 6 n isγaren, kul 3 seg ljiheṯ. 19 aḏ g kul sγer 3 n lkisan am tzalluzin s twerqeyesen aḏ nuweresen. 20 aḏ af dder lliy amas diyes 4 n lkisan am tzalluzin s nuweresen aḏ twerqeyesen. 21 aḏ g ayuh n dder lliy g amas seg kul tewerqit yseffeγ sen isγaren. am idin yeggi aydin 6 n isγaren. 22 aḏ yeggi dder aḏ tiwerqayis aḏ isγernis lkulhum d ṭṭerf yjen seg wureγ ṣbiḥ. 23 aḏ yeggas 7 n lkisan y tiftal aḏ iγemdenesen aḏ tbesi n iγeḍ seg wureγ ṣbiḥ. 24 aḏ yeggi nnir aḏ reγeltis lkul seg 36 d lkiluwaṯ n wureγ ṣbiḥ.

25 aḏ yeggi mkan n ubexxer seg isγaren n ssenṭ, d imrebbeƹ ṭṭulis aḏ lƹerḍis dereƹ aḏ lƹulwis sen leḏruƹ. aḏ leqrunis lṣeqqen diyes. 26 aḏ iγelfy lkul s wureγ ṣbiḥ, seṭeḥtis aḏ lejnabis aḏ leqrunis. aḏ yeggas lḥacit n wureγ. 27 aḏ yeggas 4 n tḥelqeṯin n wureγ adug lḥacitis, kul senneṯ g jneb bac adesen disneṯ igeḍman lliy tatqamen sisen. 28 aḏ yeggi igeḍman seg isγaren n ssenṭ aḏ iγelfin s wureγ.

29 aḏ yeggi uḏi meqdus aḏ lebxuwr lliy faweḥ mammeḵ iteggy lliy yetquddu axelleḍ n lbxur.